संविधान संशोधन विवादय् लात

राष्ट्रपतिं संशोधन याःसा रोष्टम घेराउ

येँ (सन्ध्या टाइम्स)/कन्हय् बजेट हयेगु लागिं संविधान संशोधन यायेगु धकाः सरकारं राष्ट्रपति समक्ष याना छ्वःगु सिफारिस विवादय् लाःगु दु। दकलय् न्हापां ला स्वय्म राष्ट्रपति रामवरण यादवं हे संविधान संशोधन यायेत सरकारं याना हःगु सिफारिसय् आवश्यक भ्वं मगाःनि धासें उगु प्रस्तावयात अस्वीकार याना हःगु दु। थुकिं यानाः सरकारं आः संसद मार्फत हे संविधान संशोधन याये मालीगु अवस्था ब्वलंगु दु ।

राष्ट्रपतियात संविधान संशोधनया सिफारिस याकेगु ज्यां संसदया अधिकार लाका काल धासें संविधानसभा अध्यक्ष सुभाष नेम्बाङं नं विरोध यानादीगु दु ।

उखे संविधानसभाया तःधंगु स्वंगू दलं कामचलाउ सरकारया माध्यमं राष्ट्रपति मार्फत संविधान संशोधन यात धाःसा उकिया कडा विरोध यायेगु धकाः चिचीधंगु दलतय्सं थःगु कथंया तयारी शुरु याःगु दु। नेकपा (एकीकृत)या ग्वसालय् चिचीधंगु दलत नेपाः राष्ट्रिय पार्टी, सदभावना (सरिता गिरी), जनमुक्ति पार्टी, संघीय लोकतान्त्रिक राष्ट्रिय मंच, जनता दल नापं मेमेगु दलया बैठकं थ्व तयारी न्ह्याकूगु खः। एकीकृतया नायः ऋषि कट्टेलं यदि राष्ट्रपतिपाखें संविधान संशोधन याकल धाःसा कन्हय्या संसदय् रोष्टम घेराउ यायेगु जानकारी बियादिल।। कामचलाउ सरकारया सिफारिसया आधारय् राष्ट्रपतिं बाधा अड्काउ फुकाउया नामय् संविधान संशोधन यात धाःसा व मुलुकया नितिं हे बांमलाःगु नजीर जुइगु जुयाः थःपिंसं विरोध यानागु खँ नं वय्कलं कनादिल ।

थ्वहे झ्वलय् सरकारं थःपिंसं यानागु संविधान संशोधनया प्रस्ताव विवादय् लाइगु खने दयेवं संसदपाखें हे संशोधन याकेत सदनय् छगू प्रस्ताव नं दर्ता याःगु दु। यदि राष्ट्रपतिपाखें संशोधन मजुल धाःसा कन्हय् बजेट पेश याये न्ह्यः संविधान निं संशोधन यानाः वयां तुरुन्त लिपा हे बजेट पेश यायेगु तयारी यानाच्वंगु खँ सूत्रं धाःगु दु ।