सरकारयात संविधान संशोधनया अधिकार

न्ह्याथे यानाः नं मंसीर ३ गते हे बजेट हयेमाःगु त्वहचिनाः संविधान संशोधन यायेगु लागिं स्वंगू राजनीतिक पार्टीतय्सं गुगु पहल याःगु खः, उकियात कयाः विवाद पिहां वःगु दु। खतुं थ्व विवाद संविधानसभाया चीधंगु दलतय्सं पिकाःगु खःसां उमिसं थुकियात कयाः तयाच्वंगु तर्क धाःसा अतिकं गम्भीर खः। ई मगात, मयासें मजिल धइगु त्वह तयाः मन्त्रिपरिषद्या सिफारिसय् संविधान संशोधन थेंज्याःगु ज्या याना वनेगु खःसा थ्व देशयात संविधान, संसद धइगु निकाय हे छु यायेत माल? बजेट पेश यायेत संविधान संशोधन हे नं छु यायेत याये माल? कामचलाउ सरकारं बजेट चाहिं पेश याये मजिउ हं, तर वहे कामचलाउ सरकारं संविधान संशोधन चाहिं याये जिउ? थ्व ला तसकं हास्यास्पद तर्क जुल। व नं संविधान संशोधन सुनां यायेगु धायेबलय् राष्ट्रपतिं याइगु धकाः खँ हयाच्वंगु दु ।

राजनीतिक पार्टीतय् थ्व ज्या मस्तय् भ्वय् कासा सिबें नं दयनीय जुयाच्वंगु खने दया वःगु दु। बजेट हयेमाः खः तर बजेट हयेत दुगु संविधान तकं मिचे याना वनेगु पाय्छि खँ मखु। थौं बजेट हयेमाल धकाः चायेकूगु गैरसंवैधानिक लुखां कन्हय् अन्य तत्वत दुहां वइगु खतरा प्रति झीपिं सतर्क जुइमाः। उकिं संविधान संशोधनया प्रक्रियायात कयाः चीधंगु छुं दलतय्सं यानाच्वंगु विरोधयात ध्यान बी हे माः। राजनीतिक पार्टीया नेतात तत्काल न्ह्यःने वःगु खँय् जक ध्यान बियाः तापाक स्वयेगु क्षमता मदुपिं जुयाः हे देश थ्व रसातालय् थ्यंगु खँयात ल्वःमंके मजिउ। लगातार याना वयाच्वंगु गल्तीपाखें नेतातय्सं पाठ सयेकाः काये हे माः, उकिं हे उमिगु दक्षता नं सी दइ ।

More Stories Like this