३ गते बजेट हयेत २३ दल सहमत

चिचीधंगु दलया आपत्ति राप्रपा नेपाल व नेमकिपा अनुपस्थिति

येँ (झीगु स्वनिगः)

कामचलाउ सरकारया प्रधानमन्त्री माधवकुमार नेपालं म्हिगः बुधवाः सःतादीगु २७ दलया मुँज्याय् अप्वःयानाः दलया नेतातय्सं संविधान संशोधन यानाः मंसीर ३ गते शुक्रवाः हे न्हूगु बजेट हयेमाः धकाः मत तयादीगु दुसा चिचीधंगु स्वंगू दलं धाःसा आपत्ति प्वंकेगु ज्या यात । संविधानसभाय् दुथ्याःगु मूमू राजनीतिक दल नापं २३ दलया नेतातय्सं संविधान संशोधन यानाः न्हूगु बजेट हयेगुलिइ सहमति प्वंकादीगु खः । उगु मुँज्याय् नेकपा एकीकृत जनता दल व दलित जनजाति पार्टीया नेतातय्सं धाःसा संसदयात छलेयानाः मन्त्री परिषदया सिफारिसया आधारय् राष्ट्रपति पाखें संविधान घोषणा यायेगु प्रकि्रया गलत धकाः आपत्ति प्वंकाः बिरोध यानादीगु खः ।

वय्कःपिन्सं अथे राष्ट्रपतिपाखें तप्यंक हे संविधान संशोधन यात धाःसा कन्हय् वना गलत नजीर जुइगु जुयाः अथे यायेमज्यू धकाः बिरोध यानादीगु खः । थ्व हे झ्वलय् राष्ट्रपितं तप्यंक हे संविधान संशोधन मयायेत राष्ट्रपतियात तकं इनाप यायेगु जुइ धकाः नेकपा एकीकृतया नायः ऋषि कट्टेलं धयादीगु दु । संविधानसभाया मूमू राजनीतिक दलया नेतातय्सं धाःसा ई मगाःगुलिं चीहाकःगु प्रकि्रया कथं अथे संविधान संशोधन याये त्यनागु खः धकाः धयादीगु खः । प्रधानमन्त्रीया ज्याकु बालुवाटारय् जूगु उगु मुँज्याय् नेपाल मजदुर किसान पार्टी व राष्ट्रिय प्रजातन्त्र पार्टी नेपालया नेतात धाःसा अनुपस्थिति जुयादीगु खः ।