संविधान संशोधन प्रक्रियाया विरोध
स्वंगू दलं राष्ट्रपतिपाखें संविधान संशोधन याकेत्यन : एकीकृत
येँ (सन्ध्या टाइम्स)/प्रधानमन्त्री माधव नेपालं सःतादीगु संविधानसभाय् दुथ्याःगु २७ दलया मुँज्याय् ततःधंगु स्वंगू दलं संसदयात छले यानाः राष्ट्रपतिया माध्यमं संविधान संशोधन यायेत्यन धासें चिचीधंगु दलया नेतातय्सं आपत्ति प्वंकाः विरोध याःगु दु ।
थौं जूगु उगु मुँज्याय् नेकपा (एकीकृत)या नायः ऋषि कट्टेलं संसदय् महसे मन्त्रिपरिषदया सिफारिसय् राष्ट्रपतिं बाधा अडकाउ फुकाउ धकाः संविधान संशोधन यायेत्यंगु ज्या गलत खः धकाः तःधंगु स्वंगू दलपाखें तयार याःगु संविधान संशोधनया प्रक्रियायात तसकं विरोध यानादिल।
वय्कःया उगु खँयात चिचीधंगु मेमेगु दलया नेतातय्सं तकं समर्थन यानादीगु खः। मुँज्याय् नेपाली जनता दलया हरिचरण साह व दलित जनजाति पार्टीया विश्वेन्द्र पासवानं नं स्वंगू दलया उगु प्रस्तावयात कयाः विरोध यानादीगु खः ।
संविधानसभाय् दकलय् तःधंगु दल एकीकृत माओवादी, नेपाली कांग्रेस व एमालेया शीर्ष नेतातय्गु म्हिगः च्वंगु गोप्य मुँज्यां अन्तरिम संविधानया धारा ९६ या 'क'या उपधारा ४ तक दयाच्वंगु थासय् कामचालाउ सरकारं नं बजेट हये फइगु खँ दुथ्याकाः ५ नम्बर थप यायेगु धकाः सहमति याःगु खः ।
संविधानया धारा संशोधन यायेगु नितिं संसदीय प्रक्रियां न्ह्याः वनाच्वन धाःसा मंसीर ३ गते बजेट हये मफइगु जुयाः तप्यंक हे मन्त्रिपरिषद्या सिफारिसय् राष्ट्रपतिं घोषणा यायेगु धकाः थौंया मुँज्याय् प्रस्ताव हःगु खःसा उकियात नेकपा (एकीकृत) नापं मेमेगु दलया नेतातय्सं विरोध यानादीगु खः ।
थौं सुथय् उगु मुँज्या धुंकाः 'सन्ध्या टाइम्स'लिसे खँल्हासें नेकपा (एकीकृत)या नायः ऋषि कट्टेलं धयादिल, 'संविधानसभाया ततःधंगु स्वंगू दलं थःपिनि तानाशाही पहः क्यनेगु कथं संविधान संशोधनया निंतिं गुगु कथं प्रस्ताव हल थ्व तसकं ग्यानापुगु प्रस्ताव खः, कन्हय् वनाः मन्त्रिपरिषद्या सिफारिसय् राष्ट्रपतिं न्ह्यागु नं याये फइगु अवस्था वइ, राष्ट्रपतियात सक्रिय यायेगु अवस्था वइ, कन्हय् वनाः तसकं ज्या मछिंगु अवस्था वइ धकाः उगु प्रक्रियायात विरोध यानागु खः ।'
वय्कलं स्वंगू दलया उगु प्रस्तावयात कयाः थौं हे संविधानसभाय् दुथ्याःगु चिचीधंगु दलया नेतालिसे सहलह ब्याकेगु नापं उज्वःगु कथंया ज्या मयायेत राष्ट्रपति डा. रामवरण यादवयात कन्हय् हे नापलानाः इनाप यायेगु जुइ धकाः नं धयादीगु दु ।
