सन्ध्या टाइम्सया छगूत्या दशक

वंगु झिंन्यादँ न्ह्यवंनिसें पिहां वयाच्वंगु नेपालभाषाया न्हिपौ 'सन्ध्या टाइम्स' म्हिगःनिसें झिंखुदँय् क्यन। पत्रकारिताय् छगूत्या दशक खास हे तःधंगु खँ मखु। तर नेपालभाषा थेंज्याःगु स्रोत, साधन म्हो जक दुगु चीधंगु लागाय् झिंन्यादँ तक निरन्तर छगू न्हिपौ पिहां वयाच्वनीगु धाःसा निश्चय नं छगू न्ह्यथनेबहःगु खँ खः। थौं 'सन्ध्या टाइम्स' थ्व न्ह्यथनेबहःगु थासय् थ्यंगुया श्रेय थुकियात मतिना याइपिं सकलें ब्वँमि, विज्ञापनदाता व शुभेच्छुकपिंत वन। नेपालभाषां पिहां वयाच्वंगु पत्रिकायात चीधंगु हे जूसां थम्हं फुगु ग्वाहालि यायेमाः धइगु सकलें शुभेच्छुकपिनि सदभावं यानाः हे थ्व न्हिपौ थौं तक निरन्तर न्ह्याये फयाच्वंगु खँय् शंका मदु ।

थौं देशय् गुगु ढंगं मूलधारया पत्रकारिता विकास जुयाच्वंगु खः, उकिया तुलनाय् नेपालभाषा पत्रकारितां यानाच्वंगु विकास लुधनेबहः मजू। 'सन्ध्या टाइम्स' स्वयमं नं व तहया विकास यायेफुगु मदुनि। उकिया लिउने अनेक कारण दु। 'सन्ध्या टाइम्स'या थःगु हे कमजोरी बाहेक नेपालभाषा ख्यःया सीमित बजार नं थुकिया छगू कारण खः। सीमित बजाः, सीमित पाठक झीगु दुर्बल पक्ष खः। थुकियात पार यानाः न्ह्याः वनेगु लागिं बिस्कं कथंया रणनीति आवश्यक जुइफु। न्हापा लिपा थें भविष्यय् नं सकस्यां हःपाः व तिबः दयावं वन धाःसा उगु चरण पार यायेत 'सन्ध्या टाइम्स' ताःलाइगु विश्वास थ्व इलय् प्वंकाच्वना ।

More Stories Like this