कुमारी जुइधुंकाः
शिला साय्मि
बुयाः प्यन्हु दुकुन्हुया भविष्यवाणी सार्थक जुल। चिकं बुकाः निभाः पाकाच्वंम्ह मचाया पालि स्वयाः उगु हे बहाःया छम्ह तःमां धाये माःम्ह बुरिं समितायात "थ्व मचाया पालि ससुद्यःया पालि थें च्वं। अवश्य नं लिपा द्यः जुइ तिनि" धकाः भविष्यवाणी याःगु जुयाच्वन। समितायात कुमारी दयेकेगु बिचाः वया मामं ला गबलें याःगु हे मदु धाःसां जिउ। बार्हाः तयेगु तयारी यानाच्वंबलय् समितया तसकं प्वाः स्याकल। क्यना स्वःबलय् टाइफाइड धाल। बार्हाः तयेगु छखे लात।
वंगु मोहनिया इलय् नं कुमारी ल्ययेत बहालय् मस्त मुंकाच्वंबलय् समिता झ्यालं स्वयाच्वंम्ह जुयाच्वन। बाहाःया आजुं 'मचा कुहां वा' धकाः वयात सःतल। कुमारी जुइपिं मचातय्गु झ्वलय् समिता नं फ्यतू वन। बहालं स्वम्ह मस्त ल्यःगुली छम्ह समिता नं लात। स्वम्हय् छम्ह ल्यःबलय् उकी नं समिता हे लाः वन। वंगु २०६७ आश्विन २६ गते समितायात यलया न्हूम्ह कुमारी ल्यःगु खः ।
कुमारी जुइधुंसेंलि अजूचायापुक हे समिताया प्वाः स्याःगु व ज्वरो नं क्वलाना वंगु खँ वसपोलया मामं कनादिल। समिताया जन्म २०५८ साल पुस ४ गते जूगु खः। द्यः जुसेंलि वसपोलया नयेगु, त्वनेगु व म्हितेगु दैनिक जीवन हे पाना वन। सुथसिया खुताः इलय् दनाबिज्याइ। म्वः ल्हुइगु, समाः यायेगु क्वचाल कि नित्यपुजाया निंतिं आसनय् च्वनाबिज्याइ। मामं नित्यपुजा यानादी। पुजा क्वचालकि गुताः इलय् कौला जुइ। झिताः इलय् भोजन यानाबिज्याइ। समिताया अबु कुलरत्न बज्राचार्य ज्याय् वने माःगुलिं द्यः मय्जुया नं न्हापां हे भोजन याइगु जुयाच्वन। द्यः मय्जुं मनयेकं मांपिंसं नयेगु चलन मदु। न्हिनय् निताः इलय् तुच्चा यानाः बहनी च्याताः इलय् हाकनं भोजन जुइ। भोजन लिपा न्ह्याःसा भचा टिभी स्वयाबिज्याइ, म्हाःसा द्यंबिज्याइ ।
सुथसिया भोजन लिपा वसपोल म्हितः बिज्याइ। वसपोलयात म्हितेत सुं हे पासा म्वाः। गा छपु पाछायाः सफू छगू ज्वनाः आखः ब्वंकाः म्हिताबिज्याइ। गबलें गबलें कथि नं ज्वनादी। विद्यार्थी नं थः हे शिक्षक नं थः हे जुयाः म्हिती। शिक्षिका जुइगु वसपोलया न्हापांनिसेंया रहर जुयाच्वन ।
थथे वसपोल याकःचा म्हिताच्वंगु खनीबलय् मांया मन खुल्ल मिं। न्हापा न्हापा कतांमरि, भाराकुति म्हितीम्ह वसपोलं थौंकन्हय् भाराकुतिया नां हे मकाःगु खनाः मांम्ह अजूचाः। खय्त ला पासापिं सुं मवःगुलिं नं अथे जूगु जुइफु। कुमारी जुइसातं वसपोलया पासा सुनैना श्रेष्ठ छम्ह हे जक सगं ज्वनाः वःगु खः। बाहालय् मेपिं पासापिं म्हिताच्वंगु दःसां नं द्यः मय्जु कुहां बिमज्याः। द्यः मय्जु जुसेंलि समिता झ्यालय् तकं खने मदुगुलिं बाहाःया बुरापाका तकं अजू चाः ।
वसपोल युनिभर्सल सेकेण्डेरी स्कूलय् स्वंगूगु तगिमय् आखः ब्वनाच्वनादीम्ह खः। आखलय् धाःसा वसपोल तसकं तीक्ष्ण। तर तीक्ष्ण जूसां थौंकन्हय् वसपोलया ब्वनेज्या धाःसा अन्यौलय् लानाच्वंगु दु। छेँनं पिहां वने मजिउगु बाध्यता, आर्थिक स्रोतया अभाव, स्कूलं व्यवस्था याये मफुगु स्थितिं यानाः वसपोलया शिक्षा अन्योलय् लानाच्वंगु दु ।
खतुं स्थानीय ल्याय्म्ह पुचःया पहलय् यल उपमहानगरपालिकाय् बहालवाला कुमारीया शिक्षाया व्यवस्था यायेत दछिया ६०,००० तका भत्ता माग यासें निवेदन तयागु खँ उकिया न्वकु कर्ण बज्राचार्यं कनादिल। तर उकिया लिसः धाःसा आः तकं मवःनि। स्वन्ति धुनेवं मेगु व्यवस्था मजूतले शिक्षाया समस्या स्कूलं हे समाधान याना बीगु आश्वासन प्रिन्सिपल मंदिरा अमात्यं बियादीगु खः ।
आर्थिक स्रोतया खँ ल्हायेबलय् गुथि संस्थानं ३०००/-, उपमहानगरपालिकां १०००/- तका बाहेक मेगु छुं नं बियातःगु मदु। द्यइके वइपिं छम्ह निम्ह जक दु। व नं गबलें गबलें जक। विदेशी पर्यटकतय्सं गबलें गबलें ५०-१०० तका छानावनी। गुम्हं गुम्हं ला स्व जक स्वयाः वनी। येँया कुमारीया थें चर्चा मजूगुलिं थथे जूगु जुइमाः।
येँया कुमारीथें यलया कुमारीया नं थःगु हे छेँ दु। छेँ तसकं चीकू जूगुलिं कुमारी जूपिं थःगु हे छेँय् च्वनेत बाध्य जुयाच्वंगु दु। थः म्ह्याय् द्यःमय्जु जूगुलिं लय्तायादीम्ह पूर्णशोभा बज्राचार्य द्यः मय्जुया शिक्षाया व्यवस्थाया निंतिं गनं नं स्रोत चूलाइ ला धकाः आशावादी जुया च्वनादीगु दु ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
