हैटीइ नेपाली सेनायात गोलीं कयेकाः आक्रमण

राष्ट्रसंघीय सेनाया जवाफी कारवाहीलय् छम्ह मन्त

येँ (झीगु स्वनिगः)

संयुक्त राष्ट्र संघया माध्यमं शान्ति सेना कथं वनाच्वंिपं नेपाःया सेनातय्सं छेरापति हैजा फैलेयाःगु द्वपंबिया हैतिया नागरिकतय्सं प्रदर्शन यायेगु नापं नेपाली सेनायात आक्रमण तकं यानाहःगु दु । आक्रमणया झ्वलय् म्हिगः मंगलवाः निखेरं गोलीं कयेका ल्वापु जुयाः छम्ह हैटीया नागरिक सीगु दु । हैटीया राष्ट्रसंघीय मिसनं अनया निगूगु तःधंगु शहर क्वार्टियर मोरिनय् जवाफी कारवाहीया झ्वलय् छम्ह मनू सीगु खः धकाः स्वीकार याःगु दु । नेपाःया सेनातय्सं अन छेरापति फैलेयात धकाः वंगु सोमवाःनिसें प्रदर्शन शुरु याःगु खः । प्रदर्शनया झ्वलय् नेपाःया सेनातय्त आक्रमण तकं याःगु खः ।

हैटीइ छेरापितं स्ववाःया दुने द्वःछिम्हं मल्याक मनूत सिइ धुंकूगु दुसा िझंछद्वलं मल्याक मनूत प्रभावित जुयाच्वंगु दु । अथे छेरापति फैलेयायेगु ज्या नेपाःया सेनातपाखें जूगु खः धकाः इमिसं विरोध प्रर्दशन याना वयाच्वंगु दु । प्रदर्शनया झ्वलय् इमिसं सोमवाः शहर हे ठप्प यानाब्यूगु खः । थाय् थासय् मि तयाब्यूगु खःसा लँय् लँय् तकं मि च्याकेगु ज्या याःगु खः । सोमवाः हे जूगु ल्वापुइ लानाः िझंनिम्ह हैटीया नागरिक नापं ७ म्ह शान्ति सेना घाःपाः जूगु खः । प्रदर्शनकारीतय्सं वंगु अगस्तय् छम्ह मिजं सिइगु घटनाय् नं नेपाःमि सेनातय्गु ल्हाः दु धकाः द्वपं बियाः वयाच्वंगु खः । नेपाल व संयुक्त राष्ट्रसंघं धाःसा शान्ति सेनायात गुगु कथं द्वपं बिइगु यानाः वयाच्वंगु दु उकियात अस्वीकार यानाः वयाच्वंगु दु ।