कांग्रेस-तमलोपाया ल्वापु, झिंनिम्हं मल्याक घाःपाः

येँ (झीगु स्वनिगः)

महोत्तरीइ वर्तमान सरकारय् दुथ्याःगु निगू राजनीतिक दलया कार्यकर्तातय् दथुइ सोमवाः चान्हय् तसकं ल्वापु जूगु दु । तराई मधेश लोकतान्त्रिक पार्टीया ज्याझ्वः यायेगु तयारीया झ्वलय् दयेकूगु लसकुस ध्वाखा नेपाली कांग्रेसया कार्यकर्तातय्सं स्यंकाब्यूगुलिं ल्वापु जुयाः झिंनिम्हं मल्याक मनूत घाःपाः जूगु दु । घाःपाः जूपिं मध्ये तमलोपाया कार्यकर्ता विजयकुमार यादवया अवस्था गम्भीर धकाः धाःगु दु । स्थानीय जनजागृति क्लबया तमलोपाया समर्थकतय्सं थौं बुधवाः उगु पार्टीया नायः महन्थ ठाकुरयात सःतेगु कथंया ज्याझ्वः दयेकातःगु खःसा कांग्रेस समर्थित ज्ञानदर्शन क्लबया कार्यकर्तातय्सं ध्वाखा स्यंकाः बिइवं अथे ल्वापु जूगु खः । ल्वापुइ लानाः निगुलिं पार्टीया कार्यकर्तात घाःपाः जूगु दु धकाः प्रहरीं धाःगु दु । कांग्रेस व तमलोपां क्वलयात थःपिनिगु पार्टीया कार्यकर्तात मुंकेगु थाय्या रुपय् प्रयोग याःगुलिं अथे ल्वापु जूगु खः धकाः स्थानीय मनूत उगु निगू हे पार्टीया नेता व कार्यकर्तात खनाः अजू चाःगु दु ।