पुलांगु हे कथंया बजेट ३ गते

बजेटया नितिं संविधान संशोधन यायेत कांग्रेस -एमाले बाध्य

येँ (झीगु स्वनिगः)

एकीकृत नेकपा माओवादीपाखें स्वंगू दलय् तयाच्वंगु प्रस्ताव कथं हे अन्तरिम संविधान संशोधन यानाः न्हूगु बजेट हयेगु खँय् सहमति जुइत नेपाली कांग्रेस व एमालेया नेतात बाध्य जूगु दु । म्हिगः मंगलवाः स्वंगू दलया शीर्ष नेतातय्गु मुँज्याय् एकीकृत माओवादीया प्रस्ताव कथं कांग्रेस व एमालेया नेतात संविधान संशोधन यायेगु खँय् सहमति जूगु खः । सहमति कथं आः अन्तरिम संविधान संशोधन यानाः मंसीर ३ गते कंस शुक्रवाः व्यवस्थापिका संसदय् न्हूगु बजेट हयेगु धकाः सहमति जूगु खः ।

सिंहदरवारय् च्वंगु सभामुखया ज्याकुथिइ मंगलवाः जूगु स्वंगू दलया शीर्ष नेतातय्गु मुँज्याय् अथे सहमति जूगु खः । सहमति कथं आः नेपाःया अन्तरिम संविधानया धारा ९६ संशोधन याइ । उगु धाराय् कामचलाउ सरकारं बाधा अड्काउ फुकेयायेत पेश्की बजेट जक हये फै धकाः न्ह्यथनातःगु दु । कामचलाउ सरकारं पेश्की बजेट जक हये फैगु जुयाः कामचलाउ सरकारं पूर्ण बजेट हयेके बिइमखु धकाः एकीकृत माओवादीं अडान तया वयाच्वंगु खः ।

उकिं स्वंगू दलया मुँज्यां आः उगु धारायात संशोधन यानाः सरकारं राजीनामा ब्यूगु निलाया दुने नं न्हूगु सरकार गठन याये मफत धाःसा कामचलाउ सरकारं हे बजेट हयेफै धकाः प्रावधान तयेगु खँय् सहमति जूगु खः । उगु मुँज्या लिपा माओवादीया पुलांम्ह अर्थमन्त्री नापं माओवादीया न्वकु डा. बाबुराम भट्टराईं पुलांगु सरकारं राजीनामा बिइ धुंकूगु व न्हूगु सरकार दयेके मफुगु अवस्थाय् बजेट हये लिबाःगुलिं उकियात ध्यानय् तयाः विशेष अवस्थाय् संविधान संशोधन यानाः जूसां विशेष बजेट हयेत स्वंगू दल सहमति जूगुखः धकाः धयादिल । वय्कलं पूर्ण बजेट वःसां थ्व नियमित प्रकि्रयापाखें मजूसे विशेष अवस्थाया कारणं हयेमाःगु खः धयादिसें थुगुसीया बजेटय् न्हूगु छुं नं खँ मवसे पुलांगुयात हे निरन्तरता बिइगु ज्या जुइ धयादिल । अथे हे अर्थमन्त्री सुरेन्द्र पाण्डें मुलुकय् विशेष परिस्थिति ब्वलंगुलिं अथे संविधान संशोधन यानाः जूसां मंसीर ३ गते बजेट हये त्यनागु खः धकाः धयादीगु दु ।

सरकारं थुगुसी साढे ३ खर्ब तका बराबरया बजेट हयेगु सोच दयेकातःगु जूसां बजेट हयेगु ज्या लिबाःगुलिं राजश्व उठेमजुया बजेटया आकार धाःसा छुं चीधं जुइ धकाः नं वय्कलं जानकारी बियादीगु दु । उगु मुँज्याय् माओवादीया नायः प्रचण्ड नेपाली कांग्रेसया रामचन्द्र पौडेल एमालेया नायः झलनाथ खनाल अथे हे डा। बाबुराम भट्टराई भरतमोहन अधिकारी रामशरण महत नापं मेमेपिं नेतातय्सं नं ब्वति कयादीगु खः ।