बर्दियाय् कांग्रेस नेता स्याना बिल

प्रहरी चौकी घेराउ, निगू राउण्ड हवाई फायर, बजाः बन्द

येँ (सन्ध्या टाइम्स)/बर्दियाया सानोश्री धइगु थासय् नेपाली कांग्रेस क्षेत्र नं. ३ या कोषाध्यक्ष दलबहादुर गुरुङयात स्यान बिउगु दु। बर्दियाया सानोश्री गाविसय् छेँ दुम्ह वय्कःयात वंगु चान्हय् १२ बजे खुकुरीं पालाः स्याना बिउगु खः ।

खुकुरीं पालाः तसकं घाःपाः जूम्ह गुरुङयात बाँकेया नेपालगंज मेडिकल कलेज शिक्षण अस्पतालय् वासः याके यंकूगु खःसां अन हे वासः याकुयाकुं वयागु मृत्यु जूगु खः। मेवालाल गौतम व आनन्द विश्वकर्मानाप मोटरसाइकलय् च्वनाः छेँय् वनाच्वंगु इलय् वय्कःयात आक्रमण याःगु खः ।

उगु आक्रमणय् लानाः मेवालाल गौतम नं घाःपाः जूगु दु। घटनायात कयाः ताराताल गाविस वडा नं. ५ या २० दँ दुम्ह धिरज चौधरी व १७ दँ दुम्ह विजय विकयात प्रहरीं ज्वंगु दु। गुरुङयात गुराँस माध्यामिक विद्यालय लिकसं उगु सांघातिक आक्रमण जूगु खः ।

घटना लिपा आक्रमणकारीत ज्वनाः जनतायात लःल्हायेमाः धइगु माग यासें कांग्रेस कार्यकर्ता व स्थानीय मनूतय्सं अनया सानोश्री गाविसय् च्वंगु प्रहरी चौकी घेराउ याःगु दु। चौकी घेरे याः वःपिं मनूतय्सं आक्रोशित जुयाः चौकीइ अप्पां नापं कयेकूगु खःसा उकियात पनेत प्रहरीं बल प्रयोग याःगु दु। उगु इलय् प्रहरीं निगू राउण्ड हवाई फायर समेत याःगु दु। चौकी घेरे याःगुलिं अनया स्थिति तनावपूर्ण जूगु दु। आक्रोशित जनतां कुसुम्ब बजाः नं बन्द याना बिउगु दु ।

महोत्तरीइ कांग्रेस व तमलोपा ल्वापु
महोत्तरीइ म्हिगः बहनी नेपाली कांग्रेस व तराई मधेश लोकतान्त्रिक पार्टीया कार्यकर्तातय् दथुइ ल्वापु जुयाः प्यम्ह प्रहरी नापं निगू दर्जनं मल्याक मनूत घाःपाः जूगु दु। कन्हय् सनौलय् तमलोपाया अध्यक्ष महन्थ ठाकुर वइगु ज्याझ्वः दुगु जुयाः उगु हे ज्याझ्वःया नितिं दयेकातःगु लसकुस ध्वाखा कांग्रेस कार्यकर्तातय्सं स्यंका बिल धकाः उगु ल्वापु जूगु खः। ठाकुर कांग्रेसया हे पुलांम्ह नेता खः। ल्वापु नियन्त्रणय् कायेत प्रहरी वंबलय् प्रहरीलिसे नं ल्वापु जुयाः स्थिति झन स्यंगु खः ।

घाःपाः जूपिं मध्ये तमलोपाया विजय यादवया स्थिति गम्भीर दु। वय्कःयात वासः याकेत जिल्लां पिने यंकूगु दु। घाःपाः जूपिं मेपिंत धाःसा अनया जलेश्वर व जनकपुर अञ्चल अस्पतालय् वासः याकातःगु दु ।