प्रमया चुनाव व सर्वोच्चया फैसला

संसदय् नाटकया रुपय् न्ह्यानाच्वंगु प्रधानमन्त्री ल्ययेगु चुनावयात कयाः सर्वोच्च अदालतं बिउगु आदेशं थ्व प्रकरणयात अःपुका बीगु स्वयां झन जक स्वतुमतु स्वका बिउगु दु। सर्वोच्चया आदेश वास्तवय् छु खः धकाः थुइके मफयाः राजनीतिक पार्टीतय्सं उकियात थः यत्थे व्याख्या शुरु याना हःगु दु। याकःचा उम्मेदवार थनाच्वंगु पार्टी नेपाली कांग्रेसं ला सर्वोच्चया फैसलाया आशय आः थःपिनि उम्मेदवारयात निर्विरोध त्यात धकाः घाषणा यायेगु खः धासें वहे माग सार्वजनिक याःगु दु। थुकिं यानाः सर्वोच्चया फैसलां प्रधानमन्त्री ल्ययेगु चुनावयात झन जक जटिल मोडय् यंकाः थना बिउगु खनेदु। कांग्रेसं थः उम्मेदवारयात निर्विरोध विजयी घोषणा यायेमाः धकाः पार्टीगत निर्णय हे याना बिउगुलिं आः थ्व पार्टी प्रम चुनावपाखें झन् हे लिचिलीगु सम्भावना मंत धकाः क्यना बिउगु दुसा उकिं यानाः कांग्रेस व मेगु दलतय् दूरीयात अझ तब्याका बीगु खतरा नं खने दयेका बिउगु दु। कांग्रेसं नं उम्मेदवारी लित कयाः राजनीतिक सहमतिया आधारय् सरकार गठन याये नु धकाः पहल यानाच्वंपिं नेतातय्त सर्वोच्चया फैसला व कांग्रेसया न्हूगु निर्णयं स्तब्ध याना बिउगु दयेमाः। उम्मेदवारी लित काये मखु धकाः जिद्दी यानाच्वंम्ह प्रमया याकःचा उम्मेदवार रामचन्द्र पौडेलयात सर्वोच्चया अस्पष्ट फैसलां अझ उत्साहित याना बिउगु खनेदु ।

फैसलाया थःथःगु व्याख्यां थ्व प्रस्ट याना बिल कि प्रम चुनावया थ्व विवाद सर्वोच्चं नं ज्यंके फइगु अवस्था मदु। उकियात ज्यंकेगु उपाय धइगु राजनीतिक सहमति हे जक खः। दलतय् ध्यान आः उकी हे वनेमाः ।

More Stories Like this