जिं थःथम्हं थःत न्वाये

नर्मदेश्वर प्रधान

खँयाखँय्
खँया खँय्। वय्कलंगजबगु खँ धयादिल। न्यने। पत्याः याये थाकुइ। खँ न्यने। मतिइ च्वनी। गय् पत्याः मयाये। धात्थें व मखुगु हे खँ जुइमाः। तर परिस्थितिं खँ वास्तविकता थें च्वनी। भ्याःभति हे शंका यायेथाय् मदु। मात्र गफ मखु। थःत जूगु अनुभव हे कनादीगु खः। गय् फय्गं तायेके। छम्ह बुद्धिजीवी। वय्कलं छु धयादिल। वय्कःया अनुभवया लिच्वः जुइ। खः विश्वास याये हे माल। वय्कःया आग्रह मखु। वय्कलं धयादी। "धात्थें जितः नं विश्वास दुगु ला मखु। तर विश्वास मदुसां अनुभव जुया बी। 'बौद्धिक दृष्टिं जिं' विश्वास मयाना। तर अनुभवं जितः विश्वास याये मायेका बी।" वय्कलं धयाच्वनी। जितः जिज्ञासा लुइ। वय्कःया व अनुभव छु जुइ। नुगलय् खुलदुल जुइ ।

वय्कलं खँ कनी। "पासापिं। थःथितिपिं। विरामी जुइ। अस्पतालय् तइ। अस्पतालय् स्वःवनेमाः थें जुइ। छकः हे स्वः मवः। स्याःन्याःपिं पासापिं, थःथितिपिंसं, नुगलय् स्याकी। डाक्टरं धाइ ।

विरामीयाथाय् हुलमुल याये मजिउ। बिरामीं अप्वः मनूतसें नापलाये मजिउ। इन्फेक्सन जुइ। डाक्टरं धयां छु याये? झी थःगु संस्कृति दु। औपचारिकता दु। पासापिं विरामी जुइ। स्वःवने हे माली। छकः हे स्वः मवः। विरामी, विरामीया परिवारं खँ ल्हाइ। सामाजिक स्वापुती थुकिं दाग लाकी। उकिं ख्वाः जक स्वयेया, क्यनेया लागिं नं अस्पतालय् थःथिति विरामीसां वनेमाला बी ।

वय्कःया खँ न्ह्याइ.... "तर दँबदँ दत। जिं अस्पतालय् विरामी स्वः मवनागु। पासापिं। सत्तीपिं नातेदार। न्ह्याम्ह हे अस्पतालय् यंकूसां। स्वः वनेगु त्वःता बी धुन। वनेत स्वये। तुति हे न्ह्याइ मखु। मतिइ वइ। 'तं चाःसा तं चाल का। ध्वं हे धाःसां छु याये?' वने हे मखु का। सुनां छु धाइ? स्वये का। अस्पतालय् क्वं क्वं वने। अस्पताल तप्यंक। लुमं लुमं। छाय् थें? ग्याना वइ ।

वय्कलं खँ छुइ। "...श्रीमतीया दाजु अस्पतालय्। 'दाजु हालाच्वन हं, ग्व ! जिचाभाजु छकः हे स्वःमवः धकाः। श्रीमती हालाच्वनी। जितः ला छु याये छु याये जुइ। श्रीमतीं धाइ। 'छकः झासँ नु।' दाइ अस्पतालय् तःगु लछिं हे मयाये धुंकल। 'छि छकः नं झाःगु मखु। छि तं चाल ला?' दाइया मतिइ लाइ। छधू झाया दी माली ।'

श्रीमती नुगः गर्थेसे तइ। जितः मतिइ च्वनी। अस्पतालय् जि छाय् मवनागु? वं मसिउ। वयात धाये ला कि मधाये। मतिइ तये। मवनागु कारण फुक्क कने। विश्वास जुइ। श्रीमतीं जिगु खँ थुइ। पत्याः याइ। अय्सा म्वाःल। झायादी मते। जि इलय् ब्यलय् वने। छि लिमलाः धया बी। तर जिगु विश्वास फेल नइ। अःखः श्रीमतीं न्वाइ 'का आमज्वःगु अन्धविश्वास त्वःतादिसँ। छिगु व शंका, भ्रम जक खः। थुज्वःगु वैज्ञानिक युगय् आमथे खँ ल्हाना जुल कि ला मनूतसें छितः छु धाइ। छि ब्वनातःम्ह। सःसिउम्ह। थुज्वःगु खँय् छिगु गय् विश्वास जू वन।' श्रीमतीं भाषण त्वःती। खः, श्रीमतीं धाःगु फुक्क खँ खः। यथार्थ जि नं अन्धविश्वासी मखु। अवैज्ञानिक खँय् जिं विश्वास मयाना। तर थ्व खँय् धाःसामयः मयः हे जिं व खँय् विश्वास यायेमाली। छकः मखु। निकः मखु तःक्वः हे अथे जुया बी। अन्धविश्वास थांै जिगु बाध्यता जुया बी ।

जि अन्धविश्वासी ला वैज्ञानिक? थौं जिं थःत मूल्यांकन याये मफया बी। धाये अन्धविश्वास मखु। तर छकः मखु। निकः मखु। तःकः हे अथे जुया बी। गय् पत्याः मयाये। गय् मखु धाये। व खँ खः थें जुया बी ।

वय्कलं खँ कँकं वनी। थःगु अद्भूत अनुभूति उली। न्यनादिसँ जिगु गजबगु अनुभव। अस्पतालय् विरामीत स्वः वा रे धाइ। तर अफशोच। जि विरामी स्वःवने। दुःखया खँ। स्वः वंक्व सी। छम्ह, निम्ह जक मखु। तःम्ह हेजुइधुंकल। फररर नां कया हइ ।

"विरामी स्वःवने ग्याः। अन्धविश्वासं मखु। अनुभवया आधारय् धयाच्वना। "जिं स्वः वन कि विरामी चट् जुइ छु जूगु थे।" वय्कलं लिसा लिसा कयाः धाइ। "खयेफु। थ्व क्वः जूगु व सिमा क्वःदःगु पाः थंे जुइमाः। तर छकः मखु। निकः मखु। दुर्घटना शृंखलाबद्धकथं जुइ। पुनरावृत्ति जुयाच्वनी। थुकियात आकस्मिक धाये । तर नियमित आकस्मिकता जुया बी। तःम्ह जुइ। विरामी स्वः वने। अस्पतालय्। छुं दिं लिपा मदुगु खँ न्यने मालीगु। थुज्वःगु दुःखद् घटनाया अनुभव तःकः हे जुइ। उकिं जिं अस्पतालय् वनाः विरामी स्वः मवना। थ्व खँय् त्वह तये। छले याये जुइ। ससःदाजु अस्पतालय्। स्वः मवना। मतिइ वइ, 'विरामी खनाः तं चाइ। हानं मन तये। तं वःसा तं वल का इमि। जिगु निंतिं मवनागु मखु। इमिगु हे लागि मवनागु ला खः नि।' वय्कःया खँ न्यने। जि नं त्वलहं लाता जुइ। ग्यानापुसे च्वनी। जि अचम्भित जुइ ।

व च्वाकुबाचा। साप चल्तापूर्जाम्ह। वया कलाः उसाँय् मदइ। सकसितं खबर याइ। वया इच्छा अस्पतालय् फुक्क स्वःवःसां जिउ। वय्कःयात नं तुचुतुचु फोन याइ। 'अस्पतालय् श्रीमती।' धाइ। वय्कलं च्वाकबाया भाय् थुइ। वय्कःया बिचाः हिली। वय्कलं अस्पतालय् वनेगुनिश्चय याइ। जितः पासा थ्वइ। 'क्या फसाद्'। वय्कःया खँत लुमनी। लिमलाः धाये ला। मखु थें जूसा छु याये? च्वाकबाचा खनाः तं वइ। छु सौख वया। हानं मन क्वातुके। अवैज्ञानिक खँय् विश्वास याये मजिउ। वय्कःलिसे जि अस्पतालय् वने। च्वाकबाचाया लय्ताइ। जिगु मतिइ धाःसा म्वाःमदुगु खँ लुयाच्वनी। च्वाकबाचिया कलाः अस्पतालं छेँय् यनी। ल्वय् क्वलात जुइमाः। मतिइ तये। म्वाःमदुगु शंका याना। याये मजिउ खनिं। तर झिन्हु ति लिपा। च्वाकबाचा पिकनिक मवः। न्यना। च्वाकबाचिया सुं मंत हं। वये मजिल हं। जि ला सिमां कुतुं वंथें जुल। म्वाः मदुगु खँ दासि वइ। उकुन्हु तिनि अस्पतालं जीका वंम्ह...छुं जुल थौं। वय्कः जिं विरामी स्वः वनागु। छु जूगु थ्व। वय्कःलिसे मवनेत त्वहचिनागु खः। लिपा न्यनाः च्वाकबाचिया बुरिम्ह काकीम्ह आकाझाकां मंत हं। उकिं पिकनिक व मवःगु। अले तिनि जिगु मन शान्त जुइ। अप्वः अन्धविश्वासी जुइ मत्यः। जिं थःथम्हं थःत न्वाये ।

More Stories Like this