साउदी राजकुमारया इच्छा नेपालय् लगानी

येँ (झीगु स्वनिगः)

साउदी अरबं नेपालय् पर्यटन व वायुसेवाया क्षेत्रय् लगानी यायेगु इच्छा क्यंगु दु । नेपाःया नीजि भ्रमणय् दीम्ह साउदी अरबया राजकुमार अल वालिद विन तलालं म्हिगः राष्ट्रपति डा. रामवरण यादव व उपप्रधान लिसे परराष्ट्रमन्त्री सुजाता कोइरालायात ब्यागलं ब्यागलं नापलानाः थज्याःगु इच्छा क्यंगु खः । नापलाये ज्याय् नेपाली अधिकारीतय्सं नेपालय् साउदी अरबया दूतावास चायेकेत इनाप याःगु खः । बैदेशिक रोजगारीया भुवलय् साउदी अरबय् दुिपं आपालं नेपाःिमं थीथी समस्या फयेमाःगु धासें नेपाःमि पक्षं दूताबास चायेकेत राजकुमार तलालयात इनाप याःगु खः । लिसलय् राजकुमार तलालं नेपालय् दूतावास चायेकेत थ सकारात्मक दुगु प्रतिकि्रया बियादिल । अथेहे सरकारया सिफारिसकथं राष्ट्रपति डा। रामबरण यादवं शितल निबासय् म्हिगः सनिलय् छगू विशेष ज्याभुवः यानाः महाउज्ज्वल राष्ट्रद्विप मानपदवी ब्यूगु दु । गणतन्त्र घोषणालिपा ब्यूगु थ्व दकले तःधंगु सम्मान खः । प्रधानमन्त्रीया सरकारी निबास बालुवाटारय् च्वंगु मन्त्रिपरिषद बैठकं विकास निर्माणय् याःगु योगदानया कदर यासें राजकुमार तलालयात उगु मानपदवीं सम्मान यायेगु निर्णय याःगु खः । सरकारं साउदी अरबं नेपालय् विकास निर्माणया क्षेत्रय् थप ग्वाहालि यायेगु इच्छा नं काःगु दु । राजकुमार तलाल शनिबाः बहनी नेपाः भ्रमणय् वःगु खः ।