लेखा समितिं प्र.म.याके स्पष्टकीकरण
येँ (झीगु स्वनिगः)
नेपाल वायुसेवा निगमया जहाज न्यायेगु प्रकरणयाबारे सार्वजनिक लेखा समितिं प्रधानमन्त्री माधवकुमार नेपाललिसे स्पष्टकीकरण काइगु जूगु दु । सिंहदरबारय् च्वंगु समितिया कार्यकक्षय् म्हिगः च्वंगु समितिया बैठकं वइगु मङ्सिर २ गते नेपाल वायुसेवा निगमया जहाज खरिद प्रकरणयाबारे स्पष्टीकरण बिइगु नितिं प्रधानमन्त्री नेपालयात न्हिनय् छताः इलय् सःतेगु निर्णय याःगु खः । नेपाल वायुसेवा निगमया जहाज न्यायेगु प्रकरणय् अनावश्यक दवाब ब्यूगुबारे थीथी पत्रपत्रिकाय् वःगु बुखँया तथ्य थुइकेत प्रधानमन्त्री नेपाल व अर्थ छ्याञ्जे रामेश्वर खनालयात स्पष्टीकरणया नितिं सतेगु निर्णय जूगु समितिया सभापति रामकृष्ण यादवं जानकारी बियादिल । प्रधानमन्त्री व अर्थ छ्याञ्जेया सकारात्मक स्पष्टीकरण वयेधुंकाः जक नेपाल वायुसेवा निगमया जहाज न्यायेगु प्रकि्रयायात न्ह्यःने न्ह्याकेत उजं बिइगु नं वय्कलं धयादिल ।
