शंखधर दिवसया लसताय् मोटरसाइकल र्याली
थौं कछलाथ्व दशमी अर्थात नेपाल सम्वतया प्रवर्तक शंखधर साख्वाःयात राष्ट्रिय विभूति घोषणा याःगु दिं अर्थात शंखधर दिवस । थ्वहे झ्वलय् नेपाल लोकतान्त्रिक नेवाः संघया नेवाः प्रदेशया ग्वसालय येँ टिष्टुङ मोटरसाइकल र्याली न्ह्या:गु दु ।
येँया बसन्तपुरं न्ह्याःगु उगु र्यालीया उलेज्या नेकपा एमालेया नायः झलनाथ खनालं यानादीगु खः । ज्याझ्वःया उलेज्याया झ्वलय् नायः खनालं आः वइगु संविधानय् जातिय भाषिक हक अधिकार सुनिश्चित यायेमाःगु खँ धयादिल । ने.सं. ११३१या न्हूदँया भिंतुना देछानादिसें ने.सं. ११३० य् नेपालय् दयाच्वंगु थी थी पंगः ज्यंकेमफूगु व थुगुसी थुगु ज्या पूवनीगु बिचाः प्वंकादिल । नापं राज्य पुनःसंरचनाय् वनाच्वंगुलिं आः वइगु संविधानं सकल भाषिक जातियताया सम्मान याइकथंया जुइगु खँ कनादिल ।
नेपाल लोकतान्त्रिक नेवाः संघया नेवाः प्रदेशया नायः राजेश शाक्यया सभाध्यक्षताय् जूगु उगु ज्याझ्वलय् नेकपा एमालेया पोलिटब्यूरो दुजः अष्टलक्ष्मी शाक्य, केन्द्रीय दुजः राजेन्द्र श्रेष्ठ, ने.सं. ११३१ न्हूदँ समारोह समितिया नायः विपेन्द्र महर्जन, नेपाल लोकतान्त्रिक नेवाः संघया नायः सानुराजा शाक्यया उपस्थिति दुगु खः ।
मोटरसाइकल र्याली मकवानपुरया टिष्टुङ-पालुङ थ्यंकाः साँस्कृतिक ज्याझ्वः जुइगु व थौं हे येँय् लिथ्यनीगु खँ ग्वसाः खलकं जानकारी बियादीगु दु ।
