बजेटया नितिं स्वंगू दलया कार्यदल

येँ (झीगु स्वनिगः)

संविधान सभाय् दुथ्यानाच्वंगु मूमू स्वंगू राजनीतिक दल एकीकृत नेकपा माओवादी नेपाली कांग्रेस व नेकपा एमालेया शीर्ष नेतातय्गु मंकाः कथं म्हिगः सोमवाः गोप्य मुँज्या च्वनाः व्यवस्थापिका संसदय् न्हूगु बजेट हयेगु नितिं स्वंगू दलया स्वम्ह हे प्रतिनिधित दुथ्याःगु कार्यदल दयेकूगु दु । उगु कार्यदलय् एकीकृत माओवादीया न्वकु डा. बाबुराम भट्टराई नेपाली कांग्रेसया रामशरण महत व एमालेया भरतमोहन अधिकारी च्वनादीगु दु । उगु कार्यदलं बजेटया नितिं आन्तरिक तयारी याइ धकाः धाःगु दु । म्हिगःया मुँज्यां याकःचा उम्मेदवार जुयाः नं मत्याइगु धयातःगु झिंन्हय्क्वःगु प्रधानमन्त्रीया चुनाव लिछ्यायेगु धकाः सहमति याःगु खः । अथे हे आः व्यवस्थापिका संसदया मेगु मुँज्या वइगु मंसीर ३ गते च्वनेगु धकाः नं स्वंगू दलया शीर्ष नेतातय्गु दथुइ सहमति जूगु खः ।

अथे हे राजनीतिक गतिरोध अन्त्य यायेगु नापं बजेटया तयारीया सवालयात कयाः वइगु मंसीर २ गते मेगु गोप्य मुँज्या च्वनेगु धकाः तकं सहमति याःगु खः । गोकर्णया गल्फ रिसोर्टय् म्हिगः जूगु स्वंगू दलया शीर्ष नेतातय्गु गोप्य मुँज्याय् एकीकृत माओवादीया नायः पुष्पकमल दाहाल प्रचण्ड नेपाली कांग्रेसया सभापति सुशिल कोइराला एमालेया नायः झलनाथ खनाल नापं मेमेपिं नेतातय्सं ब्वति कयादीगु खः । मुँज्या लिपा स्वंगू दलया स्वम्ह हे शीर्ष नेतातय्सं ल्हाःचिं तयाः पिथंगु प्रेस विज्ञप्तिइ म्हिगः सोमवाः ३ बजेया नितिं क्वःछिनातःगु प्रधानमन्त्री चुनावयात स्थगित यानाः मंसीर ३ गते यायेगु थप सहलह ब्याकाः न्हूगु बजेट हयेगु व स्वंगू दलया शीर्ष नेतातय्गु मेगु मुँज्या मंसीर २ गते च्वनेगु धकाः सहमति जूगु खँ उल्लेख यानातःगु दु ।

उगु मुँज्याय् एकीकृत माओवादी व एमालें आः न्ह्यानाच्वंगु प्रधानमन्त्रीया चुनावी प्रक्रियायात स्थगित यानाः मेगु हे न्हूगु प्रकि्रयां न्ह्याः वनेगु धकाः प्रस्ताव तःगु खःसा नेपाली कांग्रेसं धाःसा कांग्रेसया नेता रामचन्द्र पौडेल छम्ह जक उम्मेदवार जुयाः आः वय्कःयात निर्विरोध निर्वाचित यायेमाः धकाः सः तःगु खः । निगुलिं पक्षं थःथःगु खँ तःगु खःसा नेतातय्गु दथुइ आःयात अथे चुनावयात लिछ्यायेगु बजेटया नितिं सहलह ब्याकेगु नापं बजेट हयेगु धकाः सहमति जूगु खः । थ्व हे दथुइ म्हिगः सोमवाः हे व्यवस्थापिका संसदया कार्यव्यवस्था तथा परामर्श समितिया मुँज्या च्वनाः वइगु ३ गते प्रधानमन्त्रीया चुनाव यायेगु धकाः सहमति याःगु दु ।