बजेट हयेत स्वंगू दल सहमत
येँ (सन्ध्या टाइम्स)/थौं गोकर्ण रिसोर्टय् च्वंगु स्वंगु तःधंगु दलया गोप्य बैठकय् बजेट हयेगु खँय् सहमति कायम जूगु दु। सरकारं बजेट हयेगु धकाः यानाच्वंगु कुतःयात माओवादीं पनेगु धयाच्वंगु खःसां थौं च्वंगु गोप्य बैठकय् माओवादीं नं बजेट हयेगु खँय् सहमति क्यंगु खः ।
थुकिं यानाः बजेट हयेगु मामिलाय् जुयाच्वंगु अन्यौल चिला वंगु दु। तर बजेट गुकुन्हु हयेगु धइगु मिति धाःसा क्वःछिउगु मदुनि ।
शान्ति, संविधान व सरकार गठनया ज्याय् वयाच्वंगु गतिरोध चीकेत थौं तःधंगु स्वंगू दलया उगु गोप्य बैठक च्वंगु खः। थौंया बैठक गोकर्ण रिसोर्टय् च्वंगु खः। बैठकय् ब्वति कायेत स्वंगुलिं दलया शीर्षस्थ नेतात सुथय् हे गोकर्ण थ्यंकः वंगु खः। बैठक लिपा उकी दुथ्याःम्ह गृह मन्त्री भिम रावलं पत्रकारतय्त थुकिया जानकारी बियादीगु खः ।
वय्कलं कनादी कथं सर्वोच्च अदालतया आदेश वयेधुंकाः अन्यौलग्रस्त जूवंगु प्रधानमन्त्रीया चुनाव आःयात स्थगित यायेगु खँय् नं थौंया बैठकं सहमति कायम याःगु दु। प्रमया चुनाव थौं यायेगु धकाः मिति बियातःगु खःसां स्वंगू दलं आःयात उगु चुनाव स्थगित यायेगु सहमति कायम याःगु खः। मेगु चुनाव सम्भवतः मंसीर ३ गते यायेगु व वयां छन्हु न्ह्यः हानं स्वंगू दलया गोप्य बैठक च्वनेगु धकाः नं सहमति कायम याःगु दु। चुनाव बारे निर्णय यायेत थौं संसदया कार्यव्यवस्था समितिया बैठक नं च्वनेत्यंगु खः ।
