सूकीयात त्वःतेधुंकाः म्यान्मार गुखे?

वंगु झिंन्यादँ न्ह्यवंनिसें नजरबन्दय् लानाच्वंम्ह म्यान्मारया प्रजातान्त्रिक नेतृ आङ साङ सूकीयात नजरबन्दं मुक्त याःगुलिं अनया सैनिक सरकारं विश्वय् वयाच्वंगु हिउपाःयात लसकुस यासें थःत नं वहे अनुकुल हिला यंकेगु संकेत बिउगु दु। यद्यपि उकिया ग्यारेन्टी काये फइगु अवस्था धाःसा आः तक नं मदुनि। छाय्धाःसां सूकीया रिहाईयात उमित देशय् प्रजातन्त्र बहालीया आरम्भ खः धासें लसताया विषय कथं अझ नं मकाःनि। सूकीया रिहाईयात अनया सरकारी संचार माध्यमतय्सं तकं तःधंगु घटनाया रुपय् मकाःगु कारणं सूकीया रिहाई ताःहाकः टिके मजुइगु जकं खः लाकि धइगु आशंका ब्वलंगु दु। सूकीयात त्वःताः थःपिं प्रजातान्त्रिक लँपुइ वनेत्यनागु खः धकाः अनया सैनिक सरकारं मधाःगु कारणं सूकी पिहां वयेवं म्यान्मारय् प्रजातन्त्र वहाली जुल धकाः धाये फुगु अवस्था मदुनि ।

थः नजरबन्दं मुक्त जुइवं सूकीं अझ नं म्यान्मार जनता छप्पँ जुइमानिगु आवश्यकता दनि धकाः न्ववानादीगुलिं हे सीदु कि देशय् लोकतन्त्र वहाली यायेगु लागिं वय्कलं अझ नं संघर्ष याये मानि व वय्कः संघर्षया लागिं हे पिहां वःगु खः ।

सूकीयात त्वःतेधुंकाः आः थःपिं गय् यानाः वनेगु धकाः म्यान्मार सरकारं छुं 'रोडम्याप' न्ह्यःने हःगु मदुनि। उखे उमिसं वंगु झिंन्यादँया दुने सूकीया लोकप्रियता गुलि दनि धकाः परीक्षण जक यायेत नं वय्कःयात त्वःतूगु जुइफु। थःपिनि मेगु पलाः सूकीया लोकप्रियता नापे यायेधुंकाः जक छीगु नं जुइफु। तर निर्णय न्ह्यागु काःसां व थौंया न्हूगु युगयात ल्वइ कथं काल धाःसा उकिं म्यान्मारयात मेगु द्वन्द्वय् यंकी मखु ।

More Stories Like this