ट्रुक चाःगु न्यय्दँ लिपा नं सुधार मजू

यल (झीगु स्वनिगः)

स्वनिगःया येँलिसे स्वानाच्वंगु यलया दक्षिण भेग चापागाँ टीकाभैरब स्वाइगु प्रमुख राजमार्गया ट्रुक चाःगु ५५ दँ दयेधुंकाः नं आःतक्क कालोपत्र जुइफयाच्वंगु मदुिन । वि. सं. २०११ सालय् चापागाँनिसें टीकाभैरबतक्क ट्रुक चायेकूगु उगु सतक कालोपत्र मजुयाः दक्षिण यलया ग्रामीण भेगय् थ्यंकेत व उगु क्षेत्रय् उत्पादित तरकारी दुरु लगायत मेमेगु कृषिजन्य सामाग्री ढुवानीइ समस्या जूगु दु । टीकाभैरब थ्यंकेगु मेगु राजमार्गया हबिगत नं अथेहे दु । लगंख्यःनिसें बुङ्मती जुयाः टीकाभैरबतक्क १६ किलोमिटर दूरी दुसा लगंख्यःनिसें चापागाँ जुयाः टीकाभैरवतक्क जम्मा १४ किलोमिटर दूरी लाः । बुङ्मतीपाखेया सतक छम्पी भाज्याङ्तक्क जक कालोपत्रे जूगु दु । चापागाँनिसें टीकाभैरबतक्क थ्यनीगु सतक तीन किलोमिटर जक कालोपत्र जूगु मदुिन ।
वि. सं. २०५२ सालय् तत्कालीन प्रधानमन्त्री मनमोहन अधिकारीं हःगु थःगु गाँ थःम्हं हे दयेके ज्याझ्वः अन्तर्गत बुङ्मती छम्पी जुयाः टीकभैरबतक्क ट्रुक चायेकूगु खः । उगु सतकया नं ट्रुक चायेकूगु ११ दँ बिइधुंकाः नं आःतक्क कालोपत्र जुइफुगु मदुिन । गुकिया कारण दँय्दँसं दुर्घटना व अकालय् सीपिनिगु ल्याः अप्वयाः वनाच्वंगु दु ।

चीब्यागु छगू लेनया सतक इलय् हे कालोपत्र जुइमफयाः दच्छि छक्वः दुर्घटना जुइगु यानाच्वंगु व हरेक दुर्घटनाय् मनूया ज्यान वनेगु यानाच्वंगु स्थानीय बस व्यवसायी हरिशङ्कर भण्डारीं जानकारी बियादीगु दु । वय्कःयाकथं सतक कालोपत्र मजुयाः वातावरणीय व मानवीय असरया लिसलिसे सतक जःखःया क्षेत्रय् उत्पादित तरकारी लिसे दुरु ढुवानीइ समस्या जुयाः वयाच्वंगु दु ।

सतक चीब्या जुयाः दच्छि छगू दुर्घटना जुइ प्रत्येक घटनाय् मनूया अकालय् ज्या वनेगु यानाच्वंगु दु । स्थायीरुपं बस चलय् याये नं दइमखु बर्षाया इलय् न्ह्याबलें बन्द यायेमाः कृषिजन्य सामाग्री ढुवानीइ नापं समस्या दु - थःहे चालक नापं जुयाच्वंम्ह व्यवसायी भण्डारीं जानकारी बियादीगु दु । छम्पीनिसें टीकाभैरबतक्क च्यागू किलोमिटर कालोपत्र याये ल्यं दनी । दच्छिया निगू किलोमिटर जक कालोपत्र जुइगु यानाच्वंगु स्थानीय मनूतय्सं धायेगु याः । स्थानीय होटल व्यवसायी अाजु घिमिरे नं सतक कालोपत्रया नामय् छक्वःपतिकं चन्दा लगायत रकम सङ्कलन यायेगु यानाच्वंगुया नापनापं चीब्यागु हे सतक नं आःतक्क कालोपत्र जुइमफयाः तरकारी फलफूल दुरु लगायत सामाग्री ढुवानीइ समस्या जूगु धयादिल । टीकाभैरबपाखें कान्ति लोकमार्ग अन्तर्गत भट्टेडाँडा बगुवा जुयाः हेटौंडा थ्यंकेगु मुख्य मार्ग नं थ्वहे खः । अथेहे यानाः उगु हे मार्ग जुयाः पूर्वपाखे लेले गोटीखेल व पश्चिमपाखे भुसेल शङ्खु दलचोकी व देवीचौर लगायत दुर्गम गाँ विकास समितिइ थ्यनी वय्कलं धयादिल ।