निर्वाचनया खँय् अन्यौल

येँ (झीगु स्वनिगः)

सर्वोच्च अदालतया आदेशयात राजनीतिक दलतय्सं थःथःगु कथं ब्याख्या याःगुलिं प्रधानमन्त्रीया चुनावया सवालयात कयाः अन्यौलता ब्वलंगु दु ।

याकःचा उम्मेदवार जूसां नं गबले हे मत्याइगु कथं व्यवस्थापिका संसदय् जुयाच्वंगु प्रधानमन्त्रीया चुनावयात कयाः सर्वोच्च अदालतया फैसला पिहां वयेवं थौंया झिंन्हय्क्वःगु चुनावयात छु यायेगु धैगु खँय् अन्यौलता ब्वलंगु दु । सर्वोच्च अदालतया फैसलाय् न्ह्यःने याकःचा उम्मेदवार जूगु ल्याखं निर्विरोध निर्वाचित जुइमाःगु आशय अले ल्यूने वनाः न्हूगु प्रकि्रयाय् वनेमाःगु आशय् प्वंकातःगुलिं यानाः सभामुख सुवास चन्द्र नेम्वाङयात तसकं ज्यामछिनाः दलया शीर्ष नेतातलिसे सहलह ब्याकादीगु खःसां ठोस खँ क्वःछिइ मफयाः अन्यौलता ब्वलंगु खः । प्रधानमन्त्रीया चुनावयात हे कयाः सभामुख नेम्वाङं म्हिगः आइतवाः न्हय्गू दलया शीर्ष नेतातय्गु मुँज्या सःतादीगु खःसां मुँज्या निष्कर्षविहिन जूगु खः ।

सिंहदरवारय् च्वंगु सभामुखया ज्याकुथिइ जूगु उगु मुँज्याय् कांग्रेस छखे अले एकीकृत माओवादी व एमाले मेखे खने दत । कांग्रेसं आः याकःचा उम्मेदवार जूगुलिं निर्विरोध निर्वाचित जुल धकाः घोषणा यायेमाः धकाः थःगु खँ तःगु खःसा माओवादी व एमालें आःया अवस्थाय् न्हूगु हे प्रक्रियां वनेमाः धकाः खँ तःगु खः । अथे खँ क्वःछिइ मफुगुलिं थौं चुनाव न्ह्यः नं न्हय्गू दलया मंकाः मुँज्या च्वनीगु जूगु दु । उगु मुँज्याय् ब्वति कयादीम्ह एमालेया नेता भीम आचार्यं नियमावली संशोधन यायेगु प्रस्ताव तयागु खँय् सहमति जुइ मफुगुलिं थौं सोमवाः हाकनं मुँज्या च्वनेगु जुइ धकाः धयादिल । अथे हे सभामुख सुवास चन्द्र नेम्वाङं सर्वोच्च अदालतया निर्देशन कथं संसद नियमावली प्रचलित मूल्य मान्यताया आधारय् सहमति मालेगु कुतः अन्तिम इलय् तकं यायेगु जुइ धयादिल । थः संविधान नियम व मूल्य मान्यताया अःखः वने फैमखु धकाः न्ह्यथसें दलतय्सं हे सहमति यायेमाः धकाः नं धयादिल ।