न्हूदँया लसताय् नेवाः संघया थीथी ज्याझ्वः
नेपाल लोकतान्त्रिक नेवाः संघ यल जिल्लाया ग्वसालय् नेपाल संवत् ११३१ कछलाथ्व षष्ठी खुन्हु न्हूदँया लसताय् भिंतुना कालबिल व तुच्चा ज्याझ्वः जुल ।
सामान्य प्रशासन मन्त्री रविन्द्र श्रेष्ठया मू पाहाँसुइ जूगु ज्याझ्वलय् थीथी राजनीतिक दलया नेतात, प्रशासनया उच्चपदस्थ कर्मचारी व यक्व नेवाःतसें ब्वःतिकाःगु खः ।
ज्याझ्वलय् मूपाहाँ सामान्य प्रशासन मन्त्री नं थौंया आवश्यकता शान्ति व संविधान जुइमाथाय् राजनीतिक दलया नेतृत्व वर्गया ध्यान सत्ताय् जक लानाच्वंगुलिं थौंया समस्या वःगु धयादीगु खः ।
उगु सभाय् पाहाँकथं न्ववासें संघया केन्द्रीय नायः सानुराजा शाक्यं प्रचण्डया अध्यक्षताय् संविधानया विवादीत विषयत ज्यंकेत गठन याःगु समितिं भाषा नीतिया सवालय् नेपालीभाषायात विशेषाधिकार बीगु निर्णय पाखें भाषिक समान अधिकारया खँय् गुलि संकिर्णतिनि धकाः क्यंगु धयादिल । उगु ज्याझ्वलय् संघया न्वकू हरिकृष्ण ब्याजनकार, निरकेशरी श्रेष्ठपिंसं नं नुगः खँ तयादीगु खः ।
थ्वहे दथुइ नेसं ११३१ न्हूदँ व शंखधर साख्वा दिवसया लसताय् नेपाल लोकतान्त्रिक नेवाः संघ, नेवाः प्रदेश कमिटीं येँ-टिष्टुङ मोटरसाइकल र्याली याइगु जूगु दु ।
ने.सं. ११३१ कछलाथ्व दशमी (कार्तिक ३० गते) मंगलबाः थ्व र्याली न्ह्याइ । र्याली बसन्तपुलीं सुथसिया ७ बजे न्ह्याइगु व उगु र्यालीया उलेज्या नेकपा (एमाले)या नायः झलनाथ खनालं याइगु खँ ग्वसाः खलकं धाःगु दु ।
उकथं हे टिष्टुङय् जुइगु लसकुस ज्याझ्वलय् एमालेया नेता खड्ग ओलीं सम्बोधन यानादीगु ज्याझ्वः दु । नेवाः प्रदेशया सुनिश्चितताया नितिं थुगु र्याली यायेत्यंगु खँ सीदुगु दु । संघं प्रस्तावि यानातःगु नेवाः प्रदेशया लागाय् टिष्टुङ नं लाः । उगु र्याली उखुन्हु हे बहनी लिथ्यनि ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
