क्वाङचाउलय् १६क्वःगु एसियन गेम्स

- अनीश मल्ल
सांघाइ, चीन ।

सन् २००८या ओलम्पिक व सन् २०१०या वर्ल्ड एक्स्पो सांघाइ थंज्याःगु अन्तराष्ट्रिय मुँज्याया सुथां लाकः ग्वसाःग्वःगु चीनं हान छक्व मेगु तःधंगु अन्तराष्ट्रिय मुँज्याया ग्वसाःग्वःगु दु । चीनं थुगुसी १६क्वःगु एसियन गेम्सया ग्वसाःग्वःगु दु । चीनया प्रधानमन्त्री वेन चियाबाओया उपस्थितिइ शुक्रवाः चीनया व्यापारिक शहर क्वाङ्चाउलय् छगू भव्य उलेज्या समारोह यासें एसियन गेम्स शुरु जूगु खः ।

हलिमय् न्हावलें कासाया धेंधेंबल्लाया उलेज्या रंगशालाय् जक जुइगु प्रचलनयात त्वाःथसें चीनं १६क्वःगु एसियन गेम्सया उलेज्या पर्ल खुसिया हाइसिनशा टापुलय् याःगु खः ।

निक्वःगु विश्व युद्ध लिपा एसियाली देय्त दथुइ मित्रता व सदभावयात क्वतुकेगु तातुनां सन् १९५१य् भारतया न्हू दिल्ली न्हापांगु खुसी थ्व एसियाली गेम्स सुरू जूगु खः । थुगु एसियन गेम्सयात एसियाड नं धायेगु या । १६क्वःगु एसियन गेम्सया ग्वसाःग्वयेत ओम्मान, क्वालालम्पुर व सिओलं नं थःगु दाबेदारी न्ह्यब्वःगु खःसां लिपा स्वंगूलिं शहरं नां लित कायेवं चीनया क्वाङचाउ शहरयात एकल प्रतिस्पर्धीया रुपय् १६क्वःगु एसियन गेम्स ग्वसाःग्वयेगु ह्वता चुलागु खः ।

नोभेम्वर १२ निसें नोभेम्वर २७ तक न्ह्याइगु एसियाड क्वाङ्चाउ लिक्कसं च्वंगु तोंगक्वान, फोशान व शानवेइ धाःगु शहरय् नं जुइ । मुक्कं ४२गू थीथी कासात दुथ्याकातःगु थुगु एसियाडय् ४७६गू इभेन्टस् दु । गुकि मुक्कं ४५गू देय्या १०,१५६ कासामिपिंसं ब्वति काःगु दु । अथेहे एसियादया निंतिं ५३गू रंगशाला व थीथी हलया छ्यःगु दुसाः १७गू ट्रेनिंग सेन्टरया व्यवस्था यानातःगु दु । क्वाङ्चाउया मेयर वाङ छिङ ल्याङया कथं थ्व एसियन गेम्स व पारा एसियन गेम्स ग्वसाःग्वयेत करिव एक खर्ब चिनियाँ युआन (१२२.६ विलियन युआन) खर्च जूगु दु ।


न्याम्ह दुकूचित थीथी आकार व रंग छुनाः २०१० एसियालि खेलकुदया मास्कटत कथं छ्यला तःगु दु । चिनियाँ तय्सं क्वाङ्चाउयात दूकुचिया शहर धायेगु या । उकीं थ्व मस्कटं क्वाङचाउया प्रतिनिधित्व ब्वलंकी धैगु तातुनां दुकूचित मास्कटया कथं ल्यःगु खः । आ सियाङ, आ ह, आ रु, आ यि व ल याङ याङ यानां न्याम्ह दुकूचिया नां न छुना तःगु दु । न्यागूलिं नांयात छसिकथं उच्चारण यायेबले सियाङ-ह-रु-यि-ल याङ-याङ जुइ । चिनियाँ भाय् कथं थुकिया शाब्दिक अर्थ खः - भिंगु, सदभावना, आशीर्वाद, सफलता व लसता । (祥和如意樂洋洋)

More Stories Like this