न्ह्यागुं बिचाःया दल चायेके दु
माओवादी व कांग्रेसं थःथःगु अडान त्वःतल
येँ (सन्ध्या टाइम्स)/संघीय लोकतान्त्रिक गणतन्त्र नेपाःया न्हूगु संविधानय् आः न्ह्यागु हे बिचाःयापिंसं नं राजनीतिक दल चायेके दइ धकाः दुथ्याकेगु खँय् उच्चस्तरीय राजनीतिक कार्यदल सहमत जूगु दु। न्हूगु संविधान निर्माणया झ्वलय् जुयाच्वंगु विवादत ज्यंकेत दयेकूगु उगु कार्यदलया थौं सुथय् सिंहदरवारय् च्वंगु बैठकं उगु सहमति कायम याःगु खः ।
संविधानसभाया मौलिक हक सम्बन्धी समितिया मस्यौदा प्रतिवेदनयात कयाः थौं सहलह ब्याकूगु झ्वलय् बिचारया आधारय् चायेकीगु छुं नं पार्टीयात प्रतिबन्ध मतयेगु धकाः सहमति कायम याःगु खः। थ्व स्वयां न्ह्यः माओवादीं प्रतिगामी बिचाःया पार्टी चायेके मदइगु प्रस्ताव न्ह्यःने हयाच्वंगु खः ।
कार्यदलं ल्वाभः ज्वनाः प्रदर्शन यानाः मुलुकया अखण्डताय् लिच्वः लाकीगु गतिविधियात बाहेक मेगु छुं नं बिचाः तइगु दलत चायेके दइगु अधिकार न्हूगु संविधानय् बीगु धकाः सहमति याःगु खः ।
उगु मुँज्या लिपा संचारकर्मीतलिसे खँल्हासें एमाले नेता भरतमोहन अधिकारीं ल्वाभः प्रदर्शन यानाः मुलुकया अखण्डताय् प्रतिकुल जुइगु गतिविधि याइगु पार्टीयात जक माःगु कथं प्रतिबन्धन तयेगु खः, विचारया आधारय् प्रतिबन्ध मतयेगु धकाः सहमति जूगु खँ कनादिल। थौंया मुँज्याय् कार्यदलया कजि नापं माओवादीया अध्यक्ष प्रचण्ड, एमालेया अध्यक्ष झलनाथ खनाल, नेपाली कांग्रेसया नेता रामचन्द्र पौडेल, नेमकिपाया अध्यक्ष नारायणमान बिजुक्छे नापं मेमेपिं नेतातय्सं ब्वति काःगु खः ।
थ्व स्वयां न्ह्यः माओवादी व कांग्रेसं थःथःगु कथं तर्क तयाः माल धाःसा दलतय्त प्रतिबन्ध तयेफइगु व्यवस्था नं जुइमाः धइगु प्रस्ताव न्ह्यःने हयाच्वंगु खः। माओवादीं विदेशी दलाल, प्रतिगामीतय्त पार्टी चायेके बीगु जुइमखु धयाच्वंगु खःसा कांग्रेसं बहुलवादयात स्वीकार मयाइपिंत पार्टी चायेके बीगु जुइ मखु धकाः अडान कया वयाच्वंगु खः ।
