ल्हुतिइ न्हूदँ ज्याझ्वः

येँ (सन्ध्या टाइम्स)/न्हूदँ ११३१ क्यंगु लसताय् तिमिला खलःया मू ग्वसालय् वंगु म्हपुजा कुन्हु साँस्कृतिक भिंतुना र्‍याली तःजिक हन। ज्याझ्वलय् मूपाहां कथं झाःम्ह कवि राजभाइ जकःमिं नेपाल संवत् बारे थःगु नुगःखँ तयेगुया नापं नेवाः जागरणया कविता न्यंकादीगु खः ।

अथे हे तिमिला खलःया नायः महेश्वर मानन्धरं नेवाः भाय् व नेवाः समाजया अस्तित्वया निंतिं नेवाः राज्य व नेवाः सत्ताया विकल्प मदुगु बिचाः प्वंकादिल। बाइसधारा युवा क्लबया नायः विक्रम मानन्धरं नं नुगःखँ प्वंकादीगु खः।
ज्याझ्वलय् दँय्दसं थें थुगुसी नं परम्परागत बाजा संरक्षणया यायेगु तातुनाः गोला प्रथापाखें धिमे खलः फुसिंख्यः व सितलामाई धिमे खलः ल्हुतियात छसिकथं न्हाप व लिउया सिरपाः नं लःल्हाःगु खः ।

करिब निद्वः मनूतय्गु सहभागिता दुगु उगु ज्याझ्वलय् हाकु पतासि सिनावःपिं आपालं मय्जुपिं नापं थीथी बाजं सहितया पुचःतय्सं ब्वति काःगु खः। ज्याझ्वलय् सुकुन्दा खलःया नायः गणेशमान महर्जनं लसकुस यानादीगु खः ।

More Stories Like this