न्हूगु नेपाःया पुलांगु हे भाषा नीति

संविधानसभाय् दुथ्याःगु फुक्कं दलतय् सहमति कयाः गठन याःगु उच्चस्तरीय राजनीतिक कार्यदलं सहमति दयेकूगु भाषा सम्बन्धी नीतियात कयाः देय्या जनजातितय्सं आन्दोलनया तयारी शुरु याःगु दु। देशय् परिवर्तनया लहर हयागु धकाः दावी याइम्ह माओवादीया हे अध्यक्षया नेतृत्वय् गठन यानातःगु उगु कार्यदलं भाषा नीतिया सवालय् धाःसा वहे पञ्चायतकालीन नीतियात हे न्ह्यःने हःगु दु। गथे पञ्चायतं छगू जक भाषायात देय्या राष्ट्र भाषा धकाः मेगु फुक्कं भाषायात निगूगु दर्जाया भाषा दयेकूगु खः, आः नं पाय्छि अथे हे खस नेपाली छगू भाषायात जक प्रमुख छ्यलाबुलाया भाषा दयेकाः मेगु भाषातय्त पञ्चायतं थें हे निगूगु दर्जाया भाषा दयेकूगु दु। देय्या जनजातितय्सं थःपिंत थ्व देशया निगूगु दर्जाया नागरिक तायकूगु हे उमिगु भाषायात राज्यं मान्यता मबिउगुलिं खः। उकिसनं नेवाः थेंज्याःगु भाषां हे एकताया सूत्रय् चिनातःगु जातिया लागिं ला भाषाया अभिकार हे पहिचानया मू आधार खः। आः भाषाया मामिलाय् यदि थज्याःगु हे नीति कायेगु खःसा राज्य पुनर्संरचनाया छु अर्थ? नेपाःयात भौगोलिक रुपं थीथी प्रान्तय् विभाजित यानाः अन शासन यायेगु लागिं जक नेवाः लगायतया जनजातितय्सं राज्य पुनर्संरचनाया माग याःगु मखु। उमिसं थःपिनिगु भाषायात नं सुं स्वयां कम मजूगु मान्यता बीमाः धइगु तायेकाः हे राज्य पुनर्संचरनाया माग याःगु खः। उकिं उच्चस्तरीय कार्यदलं भाषाया सवालय् गुगु नीति काल उकियात खारेज हे यायेमाः। यदि मयात धाःसा जनजातितय्सं उकिया विरुद्ध आन्दोलन याइगु निश्चित खः, याये हे माः ।

More Stories Like this