प्रमया चुनाव विरुद्ध सर्वोच्चया आदेश

न्हूम्ह प्रधानमन्त्री ल्ययेगु नामय् संसद दुने जुयाच्वंगु नाटक दिकेगु लागिं सर्वोच्च अदालतपाखें परोक्ष रुपं आदेश वःगु दु। सर्वोच्चं संसद दुने निरर्थक चुनाव याका तयेगु ज्या पाय्छि मखु धासें अज्याःगु ज्या याकेगु बारे संसदया सभामुखं पुनर्बिचार यायेमाः धकाः आदेश बिउगु खः।
खतुं संसदय् थज्याःगु अनावश्यक चुनाव जुयाच्वंगु सभामुख सुभाष नेम्बाङयात नं यःगु मखु। अथे खःसां वय्कलं थ्व छगू संवैधानिक सिबें नं राजनीतिक समस्या जूगु कारणं राजनीतिक पार्टीत हे जानाः थ्व समस्या ज्यंकूसा जिउ धइगु बिचाः तसें पार्टीया नेतातय्त दवाव बीगु ज्या याना मच्वंगु मखु। थुकी वय्कः थम्हं हे ल्हाः तः वनबेलय् राष्ट्रपति विवादित जू थें वय्कः नं विवादय् लाः वनीगु खतरा दु। तर आः सर्वोच्च अदालतं हे वय्कःया नामय् आदेश जारी याःगु कारणं थ्व चुनावयात दिकेगु लागिं वय्कःयात लुखा चाःगु दु। आः कम से कम नं वय्कलं निश्चित अवधि बियाः अबलय् तकया दुने नं प्रधानमन्त्री ल्यये मफुत धाःसा थ्व चुनाव प्रक्रिया हे खारेज जुइ धकाः दिके फइगु अवस्था जूगु दु ।

संसदय् प्रधानमन्त्री ल्ययेगु लागिं जुयाच्वंगु चुनावयात कांग्रेसं खास यानाः माओवादीयात लाइनय् हयेगु लँपुया रुपय् प्रयोग यायेत स्वयाच्वंगु दु। तर माओवादी समस्या छगू राजनीतिक समस्या जूगु कारणं थज्याःगु लँपुं उमित लाइनय् हये मफइगु खँ कांग्रेसं थुइकेमाः। उकिया लागिं संवाद आवश्यक दु। सर्वोच्चं बिउगु थ्व आदेशयात सही रुपं प्रयोग यानाः आः सभामुखं चुनाव दिकाः पार्टीतय्त दवाव बीमाःगु आवश्यकता दु ।

More Stories Like this