विराट सम्मेलनया जनपक्षीयता?

आर.के. साइला
वंगु ने.सं. ११३० कौलाथ्व द्वादसी व त्रयोदशी ऐतिहासिक ख्वप देशय् विराट सम्मेलन व तःमुँज्याया नेवाः भाय्या सम्मेलन जुल। उकी मध्ये विराट नेपालभाषा साहित्य सम्मेलन लगभग ५० दँ दत धाःसा तःमुँज्या ३० दँ दत। गुबले ख्वप देशय् तःमुँज्या पिहां वल उबलय् निसें विराटया पलाः छ्वासुया वन। अथे जूसां नं विराट सम्मेलनं यक्व हे नेवाः साहित्यकारपिं नं बुइके धुंकूगु दु। थ्यंमथ्यं नीदँ न्हापांनिसें विराटया पासापिंसं साप हे 'जनपक्षीय जनपक्षीय' धकाः धया वयाच्वन। खँ ल्हाक्वपतिं जनपक्षीय धायेगु चलन यानाहल। कविता छपु ब्वंसां जनपक्षीय, म्येँ छपु हाःसां जनपक्षीय, बाखं छपु ब्वंसां जनपक्षीय। हार्मोनियम, गितार, तबला आदि थाःसां नं जनपक्षीय धकाः हाहां विराटं पलाः हे ल्ह्वने मफयावन। उकिं जनशक्ति तसकं हे कम जुजुं वन। सम्मेलनय् सहभागी जुइपिं नं म्हो जुजुं वन। थुखे तःमुँज्याय् धाःसा द्वलंद्वः मनूत सहभागी जुयाच्वंगु दु। सलंसः मनूत स्वयंसेवकय् परिचालन जुयाच्वंगु दु अले निन्हुयंकं भव्य रुपं सांस्कृतिक ज्याझ्वः नं न्ह्याका वयाच्वंगु दु। अथे हे ज्याझ्वलय् ब्वति काःपिं सहभागीतय्त भब्य रुपं जलपान व भ्वय् नं नकेगु याना वयाच्वंगु दु। भब्यगु सम्मेलन तसकं हे न्ह्यइपुसे च्वं। ज्याझ्वलय् सहभागी जूपिं मेचय् जक मखु थाय् मगानाः सुकुली फ्यतूपिं नं उलि हे दु। तर जनपक्षीय धाःगु विराटया सम्मेलनय् ग्वले सा? ख्वपयापिं कविता, बाखं, निबन्ध ब्वंपिं तक नं मदु। अझ मू कार्यकर्ता धाःपिं तक नं मदु। अन दुपिं निम्ह स्वम्ह पासापिं नं ज्यापु ज्यामितलिसे भेले बुइ मफु। गुलिसितं तुच्छ व्यवहार याइगु, गुलिसितं हेबाय्चबाय् यानाः हायेकेगु अले गुलिं धाःसा म्हुतुं न्ह्याक्व हे जनपक्षीय धाःसां व्यवहारं धाःसा अथे मजूगुलिं विराट सम्मेलनय् सहभागी जुइपिं म्हो जुजुं वनाच्वंगु दु। अय्नं विराटया पासापिं जनता जिमिगु पक्षय् दु धकाः हालाच्वंगु दु। थ्व खँ ला म्हछिं त्यलातःसां ल्हाः छपा द्यःने तया थें जक जुयाच्वन। विराट सम्मेलनया च्वकानायःतय्गु व्यवहार बांलाके तालय् मलाः। उकिं व्यवहार बांलाके माल, न्ह्यलं चायेके माल। जि थः छम्ह किसान जुयाः नेमकिपाय् च्वंम्ह सक्रिय कार्यकर्ता जुयाः तःमुँज्याय् नं लगे जुयाच्वना। अथे नं जिं विराटया इतिहास नं ल्वःमंके फइ मखु। जि छम्ह नेमकिपाया सक्रिय कार्यकर्ता जूसां नं विराट व तःमुँज्या छन्हुं हे जूगु तसकं सुख मदु। अले तःमुँज्या नेवाः भाय्या सम्मेलन जूसां नं खँय् भाय्या कविता, बाखं, न्वचु, अप्वः खँय् भासं जुइगु। राजनीतिया खँ अप्वः हे जुइगुलिं सम्मेलन नेवाः सम्मेलन धकाः धाःसां नेवाः साहित्य, भाषा व विकास यायेगु लक्ष्य मजुसे राजनीतिक विकास यायेगु माध्यम जुयाच्वंगु दु ।

अथे ला तःमुँज्या यायेगु तःधंगु खँ मखु। मुख्यगु खँ नेमकिपाया कार्यकर्तात विराट सम्मेलन वा उखेथुखे वनी धकाः जक सम्मेलन याये माःगु जुयाच्वन। अथे हे थुकिया कोष नं करोडौं दत। नगरपालिका, अप्पा भत्ता, गाडीया समिति व यक्व थासं चन्दा वःगुलिं करोडौं दां वःगु छु यायेगु ले ? उकिं न्ह्याथे यानाः नं विराट सम्मेलनयात लीगु ज्या जुयाच्वंगु खयेमाः। उकिं तःमुँज्यां सुरुंनिसें विराट सम्मेलनया पम्प्लेट, ब्यानर लिकायेगु याना वयाच्वंगु खः। खँ तयेगु, सम्मेलन जुइथाय् फोहोर वांछ्वयेगु, झ्यालं लखं लुना हयेगु, खिचा, द्वहँ, सा ख्याना हयेगु विचार जिमि पासापिनिगु खः। थुकी विराट सम्मेलनया पतन जुइगु मखु कि नेमकिपाया जक पटन जुइगु खः। अथे हे थुगुसीया तःमुँज्या सम्मेलन ख्वपया कुथुबही धाःगु थासय् जूगु खः। भिक्षुपिं पुजा पाठ यायेगु थासय् तःमुँज्या यानाः हस्तक्षेप यायेगु वा दादागिरी क्यनेगु ज्या जू वन धकाः द्वपं बिया हल। निदँ न्ह्यः लोडसेडिङ्गया विरोध जुलुस झीगु नेमकिपां याःगु खः। उबलय् उबलय् गुर्जुपिनिगु ज्याझ्वलय् माओवादीया नेता बादल वइगु खँ जूगुलिं गुर्जुपिनिगु झ्याः, खापा तज्यात। उकिया द्वपं झीसं काये मालाच्वंगु दु। अझ नं झीसं गुर्जुपिनिगु ग्वाहाली कायेगु दुःखया हे खँ जुल। थुकिं नेमकिपां नं न्ह्यलं चायेके माल। जनतायात दुःख बियां झीत छुं नं लबः दइ मखु। झी नं कन्हय् वनाः विराटया अवस्थाय् लाः मवनेमा ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया