सुयातं विश्वास मदुगु गोप्य वार्ता

शान्ति, संविधान व सरकार निर्माणय् वयाच्वंगु व्यवधान चीकेगु ताः तयाः स्वंगु तःधंगु राजनीतिक पार्टीया शीर्ष नेतातय् गोप्य वार्ता शुरु जूगु दु। खतुं थ्व वार्तापाखें नं छुं हे लिच्वः पिहां वइ धइगु खाय् सुयां विश्वास दुगु ला मखु, मनूतय्सं विश्वास मयाः थें शीर्ष नेतातय् न्हापांगु बैठक बिनाः निष्कर्ष क्वचायाः थौं हानं च्वनेगु धकाः सहमति नं जूगु दु। तर न्हापांगु चरणया वार्ता लिपा दलतय् दथुइ तयारीया लागिं धकाः मेगु छुं हे बैठक/वार्ता मजूगु कारणं यानाः थौं च्वनीगु वार्ता नं ताः हे लाइ धकाः आशा यायेगु थाय् धाःसा मदया बिउगु दु ।

स्वंगुलिं तःधंगु पार्टीया अडान व बिचाः छु खः धकाः सकस्यां सिउ। समस्या समाधान याये धकाः च्वंगु बैठकय् तःधंगु पार्टीतय्सं वहे पुलांगु अडान हे जक प्रस्तुत यायेगु बाहेक मेगु छुं हे मयाः। उमिसं सिउ, सुं छम्हेस्यां थःगु अडान त्याग मयाःतले समस्याया च्वः लुइगु सम्भावना मदु। तर उमित सम्झे याइपिं सु? थुकिया लबः विदेशी शक्तितय्सं कयाच्वंगु द्वपं नं वयाच्वन। तर विदेशी शक्तियात थ्व कासां पिने तयेगु ज्या नं जुयाच्वंगु मदु। मू खा ला छु धायेबलय् स्वंगुलिं तःधंगु शक्तितय्सं धयाच्वंगु खा मुलुकयात न्ह्यःने यंकेगु हे खः। उकिया लागिं पुलांगु छुं खात त्वःतेमाः। न्हूगु बिचाःयात ज्वनेमाः। अज्याःगु न्हू बिचाः छगू पक्षीय जुइ मजिउ। उकिं कर्पिनिगु न्हूगु बिचाःयात नं कायेमाः ।

अले अज्याःगु न्हूगु बिचाः लोकतान्त्रिक जुइमाः। थुलि खा स्वीकार यायेगु साहस मयाःतले समस्या ज्यनी मखु। यदि थुलि स्वीकार याये धकाः मतिइ मतयेगु खःसा थज्याःगु गोप्य वार्ताया नाटक क्यना च्वनेमाःगु आवश्यकता नं मदु। नेतातय्त जनतां बांलाक हे लना तयेधुंकूगु दु ।

More Stories Like this