बहुपतिवाद

नर्मदेश्वर प्रधान

खँयाखँय्
देशय् राजनीतिक स्थिति झंझं गथः चिनावनी। न्हियान्हिथं जटिल जुयावनी। समाधान याइपिं राजनीतिक पार्टीत दथुइ दूरी वृद्धि जुइ। आवश्यक सहमति खने दइगु सम्भावना हे दइ मखु। अचानक पार्टीतय् दथुइ गोप्य वार्ता जुइगु खँ वइ। स्वंगुलिं पार्टीया शीर्षस्थ नेता दथुइ गनं तापाक्क गोप्य वार्ता जुइगु खँ पिहां वइ। याकनं गथः ब्यनीगु विश्वासया हल्ला वइ। वार्ताय् सीमित मनूतय् जक सहभागिता दइ। पत्रकारतय्त नं वार्ताया ख्यलय् वने बी मखु। तापाक्क तइ। वार्ताया विशेषता गोपनीयता जुइ। गोप्य वार्ता जरुर छुं निष्कर्ष बी ।

जनतातय्त नेतातसें आशा क्यनी। जितः गोप्य वार्ताया अर्थ पाइ। छाय् गोप्य वार्ताया हौवा सृजना जुल? नेतात जनताया सृजना खः। नेतातय्त जनतां निर्वाचित यानाः संविधानसभाय् छ्वइ। वार्ता, छलफल यायेगु थाय् संविधानसभा खः। जनप्रतिनिधि नेतात सार्वजनिक थासय् च्वनाः छलफल यायेमाःपिं। छाय् इमित सुनां मसिउ थाय् च्वनाः खँ ल्हाये माल? आमजनं तापाक्क वने छाय् माल? जनता इमिगु वार्ताया निंतिं छाय् बाधा जुल? छाय् इमित गोप्यस्थलया आवश्यक जुल। थ्व गोप्य वार्ता खालि जनतायात झंगः लायेगु चाल जक खः ला? शंका याइपिं खनेदइ ।

नेतात जनताया प्रतिनिधि खः। इपिं खुँ मखु। षडयन्त्रकारी मखु। इपिं छाय् गोप्य वार्ताय् च्वनेमाल? सामान्यतया गोप्य वार्ता खुँ, दाखुँतय्सं सम्पन्न याइ। सुनां नं मसीकेगु लागि इमि निंतिं गोप्य विधि अनिवार्य जुइ। तर नेतातय् जनताप्रति दायित्व दइ। जनताया सामिप्यय् च्वनाः इमिसं छलफल यायेमाः। निर्णयस वयेमाः ।

थःगु अदक्षताया कारणं लाज शरमया कारणं गोप्य थासय् वार्ता याःवंगु खः ला? निर्लज्ज कय्ता मदुपिं जूगुलिं सुलाः सुलाः नापलाः जूगु खः ला? विवाह याइ। सुहागरात गोप्य थासय् वनाः न्यायेकी। थौंकन्हय् ल्यासे ल्याय्म्हत गोदावरी, दक्षिणकाली, गोकर्ण, थाय्थासय् वनाः गोप्य प्रेम याः वं। स्वतन्त्र प्रेम याना जुइपिंत ला गोपनीयता नं आवश्यक मजुइ धुंकल। मरुया देगःदेगलय् च्वनाः नं स्वच्छन्द प्रेम याइपिं दु। प्रेमय् गोपनीयताया महत्व न्यून जुजुं वयाच्वंगु दु। तर राजनीतिइ धाःसा गोपनीयतां थाय् कया हयाच्वन। जनताया पुचलय् च्वनाः छलफल यायेमाःपिं नेतात सुनां मसिउ थाय् वनाः गोप्य राजनीतिया खेल म्हितेत स्वयाच्वन। मानाै सुहागरात यात्राय् थें राजनीतिक नेतातय् यात्रा गोप्य थासय् जुयाच्वन। थ्व नं सुहागरात गय् धाये? फुक्क मिजंत जक। समलिङ्गी सुहागरात थाय् माला वइ। थुज्वःगु शंका हे याःसां ।

गोप्य बैठक छाय् याःवन? थुपिं सु गथे सकस्यां सिउ। अनुमान यायेफु। आः गोप्य बैठक यायेवं थुमि विचार, बुद्धिइ चमत्कारी हिउपाः वइगु खः ला? थन मवःगु विचाः, गोप्य भेटय् स्वतः वइ। व छु सूत्र खः? अन इपिं झारफुक याकः वंपिं खः ला, गोप्य बैठक त्वह चिनाः? थ्व नेतात तापाक्क वनाः गोप्य बैठक याःवंगु मेगु हे कारण दु। इपिं पक्का अन नाङ्गा च्वनाः बैठक यायेत्यंगु जुइ। निर्वस्त्र बैठक यायेमाःगुलिं इमिसं तापाक्क कुंकुचाय् नापलाःवंगु जुइ। खोल मतसे नाङ्गा, नग्न रुपय् लाज मचासे झी खा ल्हाये वा।' आह्वान जूगु जुइमाः। कय्ता दुपिंसा इपिं संविधानसभा, तिंख्यलय् च्वनाः छलफल यायेत छाय् मछाली? कय्ता दुपिं नेतात जनता दथुइ दनेत मछाली मखु। तर नाङ्गा बाबा नेतात वसःइसः त्वःताः सिचुक्क खा ल्हायेत सुं मदुथाय् वंगु जुइमाः। छगू उखान लुमनी, 'नङ्गा नाचे हजार दावे' ।

जिमि दिगुद्यः भचा अनकन्तारय् लाः। झिझांमिझां दं। अन छगू सतः दु। जिपिं दछिइ छकः अन वने। सतलय् च्वनाः भ्वय् नयाः वये। मनूतसें धाइ व सतः न्हापा लिपा खुँतय् गोप्य बैठक याइगु थाय् हा। खुया हःगु इनीगु थाय् हा। खुँ दाखुँत खुल्ला थासय् नापलाइ मखु। इमि निंतिं गोप्य बैठक अनिवार्य जुइ। अवैध मतिना याइपिंसं गोप्य थाय्या खोजी याइ। सुनां नं मखंक मसीक ज्या क्वचायेकेत स्वइ ।

नेतातय् बिचाः, नीति सिद्धान्त खुल्ला सफू थें जुइमाः। ताकि इमित सकस्यां ब्वने फइ। तर खुँ दाखुँतसें नालीगु गोप्य बैठकया विधि थन नेतातसें छाय् नाल? प्रधानमन्त्री मू दलत दथुइ पालंपाः जुइगु खँ वयाच्वंगु दु। प्रधानमन्त्री पदया भागबण्डा यायेगु निंतिं हे गोप्य बैठक जूगु खः ला? गोप्य बैठक च्वंगु खँ न्यने। खुयाहःगु धन इनीगु जिमि दिगुद्यःया सतः लुमनी। देश थौं सतलय् परिणत जूगु अनुभूति जुइ। राजनीतिइ थौं बहुपति व्यवस्था वयेत्यंगु दु। बहुपति प्रथाय् प्यम्ह�न्याम्ह दाजुकिजाया छम्ह हे कलाः जुइ। पालंपाः कलाःयात छ्यली। बहुपति व्यवस्थाय्। झीगु राजनीतिया ख्यलय् नं 'प्रधानमन्त्री पद' छगू हे। जुक्केत स्वइपिं दलत धाःसा तःगू दइ। थन बहुपतिया व्यवस्था आवश्यक जुइ। थुकिया निंतिं आम सहमतिया निंतिं गोप्य बैठक जूगु जुइमाः। हुइनाभुइना जुइ ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया