जनकपुरय् माओवादी कार्यकर्ताया हत्या

जनकपुर (झीगु स्वनिगः)

जनकपुरया अर्घजा पुखू लिक्क म्हिगः सुथय् छम्ह माओवादी कार्यकर्ताया हत्या जूगु दु । जनकपुर १० च्वनीम्ह स्वीनिदँया मुकेश दत्तयात गोलीं कयेकाः स्याःगु खः । छठ नखःया लसताय् लुयावःगु सूद्र्यःयात अर्घ बिइत ब्वति कयाच्वंम्ह माओवादी स्थानीय कार्यकर्ता दत्तयात अज्ञात पुचलं गोलीं कयेकाः स्याःगु खः । हत्या सुनां व छाय् यात धइगु अझ नं प्रष्ट मजूनीगु प्रहरीं जानकारी ब्यूगु दु । घटनालिपा जनकपुरया सुरक्षा व्यवस्था थप कडा याःगु दु । एकीकृत नेकपा माओवादी शान्ति प्रकृयाय् वयेधुंकाः तराई लगायतया क्षेत्रय् दर्जनौं माओवादी कार्यकर्ताया हत्या जुइधुंकूगु पार्टी श्रोतं जानकारी ब्यूगु दु ।