भारतीय माओवादीनाप वैचारिक स्वापू - छ्याञ्जे गजुरेल
येँ (झीगु स्वनिगः)
एकीकृत नेकपा माओवादी या छ्याञ्जे सीपी गजुरेलं थःगु पार्टी व भारतीय माओवादी पार्टी दथुइ वैचारिक स्वापू दुगु खँ न्ह्यथनादीगु दु ।
जनसाचार अभियान नेपालपाखें ग्वसाः ग्वःगु छगू साक्षात्कार ज्याभुवलय् वय्कलं धयादी - गथे नेपाली काङ्ग्रेस व भारतीय काङ्ग्रेस आईदथुइ वैचारिक स्वापू दु अथेहे जिमिगु पार्टी व भारतीय माओवादी पार्टी दथुइ नं वैचारिक स्वापू दइगु स्वाभाविक खः । भारतीय माओवादीलिसे जक मजुसे माक्स्रवाद लेनिनवाद व माओवादयात थःगु मार्गदर्शक सिद्धान्त मानय् याइगु संसारया फुक्क माओवादी पार्टीलिसे थःपिनिगु वैचारिक स्वापू दुगु छ्याञ्जे गजुरेलया धापू खः ।
तर वय्कलं भारत लगायत संसारया छु नं माओवादी पार्टी व एमाओवादीदथुइ गबलें हे कार्यनीतिक स्वापू मदुगु प्रष्ट यानादिल । थःगु पार्टीं भारतीय माओवादी पार्टीलिसे जनयुद्धकालय् नापं तालिम प्रशिक्षण व ल्वाभःया स्वापू हे मतःगु दाबी यासें वय्कलं धयादिल - जनयुद्धकालय् नापं तालिम प्रशिक्षण थेंज्याःगु स्वापू मतइगु जिमिगु पार्टीं शान्तिकालय् थज्याःगु स्वापू तयेगु खँ हे वइमखु थ्व फुक्क न्हिलासुं जाःगु खँ खः ।
भारतीय माओवादी पार्टीलिसे वैचारिक बाहेक फौजी लगायत मेमेगु स्वापू तःसा भारतं दमन यायेगु त्वह दइ धइगु खँ थःगु पार्टीयात यक्व न्ह्यः हे थूगु धयादिसें वय्कलं थज्याःगु खँ थुइकाः नं भारतं थःपिंदथुइ गम्भीर द्वपं बिइगु दथुइ तःधंगु ग्राइन्ड डिजाइनु दु धयादिल ।
