राष्ट्रिय सफू कुथि सङ्कटय्

यल (झीगु स्वनिगः)

पर्याप्त भौतिक पूर्वाधार मदयाः राष्ट्रिय सफू कुथि सङ्कटय् लानाः वयाच्वंगु दु । सफू कुथिया नितिं व्यवस्थित भवन व पर्याप्त सफू चूलाके मफूगु कारण अन्तर्राष्ट्रियस्तरया उगु सफू कुथि सङ्कटय् लाःगु खः ।

छगू इलय् विदेशी ब्वमिपिनिगु नितिं नापं आकर्षणया केन्द्रविन्दु दुगु उगु सफू कुथिइ ब्वमिपिनिगु नितिं च्वनेगु पर्याप्त थाय् मदुसा उमिसं ययेकूगु सफू चूलाके फइगु अवस्था नं मदु । वि. सं. २०१८ सालंनिसें पूच्वनिसें हरिहर भवनया चिब्याःगु थासय् कात्तुकाकाः च्वनेमाःगु सफू कुथिया बाध्यता नं उलि हे दु । सफू कुथिइ ययेकूगु सफू ब्वने मदइगु व दुगु सफू नं गबलें गबलें सहजरुपं ब्वने मदइगु यानाच्वंगु सफू कुथिया नियमित ब्वमि राजु श्रेष्ठं धयादिल । थाय् अभाव व पर्याप्त सफू मदुसां नं छेँय् थ्यंक यंकाः ब्वनेगु वातावरण सफू कुथिं दयेकाः ब्यूसा राहत जुइगु वय्कःया धापू दु ।

सरोकारवालाया बेवास्ताया कारण उचित व्यवस्थापन यायेमफुगुलिं सफू कुथि सङ्कटय् लानाः वनाच्वंगु राष्ट्रिय सफू कुथिया नितिं प्रमुख दशरथ थापां धयादिल । वय्कःया कथं सफू कुथिइ ब्वनामिं सहजरुपं च्वनाः ब्वनेगु अवस्था मदु गबले गबलें र्‍याकय् च्वनाः वा बँय् चकटी लानाः ब्वनेमाःगु बाध्यता दु । देय्या हे राष्ट्रिय सफू कुथि जूसां नं नेपाःया बारे फुक्क कथंया सफू दयेमाःगु खः व मदु बजेट मदयाः सफू न्यायेफयाच्वंगु मदु सरोकारवालाया बेवास्ताया कारण सफू कुथि हे सङ्कटय् लाइगु अवस्था दु प्रमुख थापां धयादिल । राष्ट्रिय सफू कुथिइ स्वदेशी लिसे विदेशी विद्यार्थीया नापनापं ब्विमं सफू व पत्रपत्रिकाया धलः स्वयाः सफू कुथिइ उपलब्ध सफू ब्वने दइ ।

थीथी देय्या पाठकं अनलाइनमार्फत् सफूया धलः स्वयेदइगु व्यवस्था नं यानातःगु दु । याकनं हे सन्दर्भ सामग्री तइगु उगु सफू कुथिं जानकारी ब्यूगु दु । थ्वहे आर्थिक दँदुने विद्यावारिधीया एक हजार शोधपत्र व अनुसन्धान याईपं विद्यार्थीपिनिगु नितिं मदयेकं मगाःगु सामग्री तइगु सफू कुथिया तयारी दु । राष्ट्रिय सफू कुथिइ थौंकन्हय् स्वदेशी लिसे विदेशी च्वमि व प्रकाशनया च्यय्गुंगू सफूत दु ।

More Stories Like this