जागरण मञ्चया भिंतुना ज्याझ्वः

येँ (झीगु स्वनिगः)

नेवाः जागरण मञ्चया ग्वसालय् म्हिगः क्षेत्रपाति पार्टी प्यालेसय् माचया कजि सुजिब बज्राचार्यया नायोसुइ भिंतुना कालबिल व तुच्चा ज्याझ्व जूगु दु । थीथी राजनीतिक पार्टीया नेवाः नेता कार्यकर्ता कलाकार उद्योग व्यवसायी साहित्यकार पत्रकार व नेवाः जातीय आन्दोलनया न्ह्यलुवाःपिंसं व्वतिकाःगु उगु ज्याझ्वलय् एकीकृत माओवादीया नेवाः राज्य समितिया इन्चार्ज लिसें सभासद् हितमान शाक्य, कांग्रेसया सभासद् तीर्थराम डंगोल, जनकवि दुर्गालाल श्रेष्ठ, ख्याली जुजु मदनकृष्ण श्रेष्ठ, ज्यापु महागुथिया नायः विपेन्द्र महर्जनिपंसं भिंतुना न्वचु तयादीगु खः ।

म्हिगः हे सुथय् जागरण मञ्चया ग्वसालय् येँ बुङ्ग भिंतुना मोटर साइकल र् याली जूगु दु । मञ्चया कजि सुजिब बज्राचार्य उलेज्या यानाः न्ह्याःगु र्‍याली येँ व यलया नगर लागाय् नं भिंतुना व नेवाः राज्यया माग यानाः नारा थ्वयेकुसें चाःह्यूगु खः । र्‍यालीयात लसकुस याःसें बुङ्गय् जूगु सभाय् सुजीव बज्राचार्य भाजुरत्न नेवाः दिनेश श्रेष्ठिपंसं नुगः खँ तयादीगु खः । र्‍याली ख्वना जुयाः येँया क्षेत्रपातिइ क्वचाःगु खः ।