माओवादीया गोप्य दस्ताबेज सार्वजनिक
भारतया मेगु ग्रायण्ड डिजाइन
श्रीकृष्ण महर्जन
भारतं एकीकृत नेकपा माओवादी विरुद्धया ग्रायण्ड डिजाइन कथं जनमुक्ति सेनां भारतीय माओवादीयात तालिम बिल धकाः बय्बय् यायेगु नाप नापं आः हाकनं मेगु डिजाइन कथं माओवादीया गोप्य दस्तावेज नेपाःया हे संचार माध्यमपाखें सर्वाजनिक याःगु दु । माओवादीया विस्तारित केन्द्रीय कमिटीया मुँज्या जुइगु थ्यंमथ्यं छवाः जक ल्यं दनिगु इलय् तसकं गोप्य यानातःगु माओवादीया नायः पुष्पकमल दाहाल प्रचण्ड वरिष्ठ न्वकुपिं मोहन बैद्य किरण डा. बाबुराम भट्टराईया ब्यागलं ब्यागलं कथंया प्रतिवेदन व स्पष्टिकरण त देय्या मूलधार धयातःगु राष्ट्रिय पत्रिकातमाध्यमं सार्वजनिक याःगुयात भारतया हे डिजाइन खयेमाः धकाः अनुमान यानाहःगु दु ।
माओवादी पार्टीयात कमजोर यायेत नापं पार्टीया आन्तरिक सवालयात कयाः बिवाद तच्वयेकेगु नितिं अथे माओवादी विरुद्ध कुतः याःगु धइगु स्पष्ट अनुमान यानाहःगु दु । माओवादीया छम्ह नेतां भारतया डिजाइन कथं अथे गोप्य दस्तावेज सर्वाजनिक जूगु खयेमाः धैगु खँयात अस्वीकार यानामदी । माओवादी पार्टीं वइगु मंसीर ५ गतेनिसें थःपिनिगु केन्द्रीय विस्तारित मुँज्या यायेगु तयारी यानाच्वंगु नापं उगु मुँज्याय् जक उगु दस्तावेजयात कयाः सहलह ब्याकेगु धकाः धयातःगु खः । पार्टीया जिल्ला सदस्य तक भेला यानाः प्रोजेक्टरया माध्यमं ब्वंके बिइगु अले लिखित रुपं मबिइगु यानातःगु उगु गोप्य दस्तावेज गुकथं पूर्ण रुपं म्हिगः शनिवाः संचारमाध्यमय् पिहांवल थ्व तसकं च्यूताःया विषय खः ।
माओवादीं भेला व प्रशिक्षणया झ्वलय् पार्टीया आन्तरिक खँय् गम्भीर रुपं सहलह ब्याकेमाः अले विस्तारित भेलालिपा पार्टी छप्पँ जुयावइ धकाः धायेगु यानाः वयाच्वंगु खःसा व हे कथं पार्टीया जिल्ला स्तरया कार्यकर्ताया दथुइ तक दुने दुने बहस जुयाच्वंगु खः । दस्ताबेज पिहां वयेवं उगु बहस दुने सीमित मजूसे सर्वसाधारणया मनूतय्गु दथुइ तकं जुइगु जूगु दु । छगू कथं धायेबलय् प्रत्येक नागरिकया दथुइ बहस जुइगु स्वतन्त्रता लोकतान्त्रिक अभ्यासया ल्याखं ला बांलाःगु हे जुइ अथेजुयानं पार्टी दुनेया अन्तविरोधयात म्वाःमदुगु कथं बय्बय् यात धाःसा अवश्य नं उिकं पार्टीया निितं बांमलाःगु लिच्वः लाकेफु ।
अथेला दस्तावेज छन्हु हे तःगू मछि राष्ट्रिय पत्रिकाय् पिहांवःगु धैगु संयोग जक मखु थ्व योजनाबद्ध कथं हे जूगु खः धकाः अःपुक हे अनुमान यायेफु । माओवादी नाप लिक्क लाःगु संचार माध्यम धयातःगु व पत्र पत्रिकां पिमथनेगु अले व्यापारितय्सं संचालन यानाच्वंगु संचार माध्यमतपाखें अथे गोप्य दस्ताबेज पिहां वयेवं मनूत झन अजू चाइगु स्वाभाविक हे खः । माओवादी दुने हे भारतया गुप्तचरतय्गु पहुँचया माध्यमं अथे गोप्य दस्तावेज सार्वजनिक यायेगु ज्या माओवादीया विस्तारित मुँज्या नापं नेपाःया राजनीतिइ तकं प्रभावित यायेगु नितिं खयेमाः धकाः नं अनुमान यानाहःगु दु ।
उकिं माओवादीया कार्यकर्तातय्सं ला गनं पार्टी दुने छुं छुं मनूतय्सं ध्यबा कमेयायेगु नितिं संचार माध्यमयात उगु दस्तावेज मिइगु ज्या याःगु जकं मखुला धकाः तकं न्ह्यसः थनाहःगु दु । माओवादी दुनेया दस्तावेजयात कयाः अथे संचारमाध्यमं माओवादी दुने तसकं गुटबन्दी जुल धकाः च्वयेगु कथंया अवसर जुयाब्यूगुलिं नं कार्यकर्तातय्सं न्ह्यसः तइगु स्वाभाविक हे खः । यदि अथे ध्यबाया नितिं दस्तावेज मिइगु ज्या याःगु खःसा थ्व छगू कथं माओवादीया नितिं हाथ्या जुयाबिइ । गोप्य धयातःगु दस्तावेज अथे पिहांवःगुलिं माओवादी पार्टी गम्भीर जुइमाःगु नापं उगु खँय् माःगु कथं अनुसन्धान यायेमाः धकाः तकं धयाहःगु दु ।
