न्हूम्ह प्रधानसेनापति गुरुङ ?

समस्या ज्यंकेत एमालेया प्रस्ताव

चर्चाय् वयाच्वंगु प्रधानसेनापति रुक्मांगद कटवाल स्पष्टीकरण विवाद ज्यंकेया लागिं एमालें समाधानया छगू प्याकेज न्ह्यःने हःगु दु । एमालें हःगु प्याकेजय् प्रधानसेनापति रुक्मांगद कटवाल लगायत माओवादीं प्रधानसेनापति दयेकेगु धकाः प्रस्तावित यानातःम्ह 'सेकेण्डम्यान' कुलबहादुर खड्का निम्हेसितं
राजीनामा बीकाः 'थर्डम्यान' जुयाच्वंम्ह छत्र बहादुर गुरुङयात न्हूम्ह प्रधानसेनापति दयेकेगु ग्वसाः प्रस्ताव यानातःगु दु ।

कटवालयात प्रधानसेनापति याना तये माओवादीयात मयइगु व कुलबहादुरयात प्रधानसेनापति दयेके विपक्षीतय् मयःगु कारणं निम्हेसितं चीकाः न्हूम्हेसित हे अवसर बिल धाःसा निगुलिं पक्षया चित्त बुझे जुइगु तायेकाः एमालें थ्व प्रस्ताव हःगु खः । सूत्रतय्सं बिउगु जानकारी कथं एमाले अध्यक्ष झलनाथ खनाल थम्हं हे थ्व प्रस्ताव तयार याःगु खः । एमालें थुकियात आधिकारिक रुपं धाःसा पेश मयाइगु खँ धाःगु दु ।

थर्डम्यान जुयाच्वंम्ह छत्र बहादुर गुरुङयात प्रधानसेनापति दयेकेगु प्रस्ताव प्रतिपक्षी नेपाली कांग्रेसयात स्वीकार्य जूसां सत्तारुढ पार्टी माओवादीयात धाःसा स्वीकार्य मजुइफुगु खँ धाःगु दु । छाय्धाःसां छत्रबहादुर गुरुङ कांग्रेस पृष्ठभूमियाम्ह मनू खः । वय्कःया अबु कांग्रेसया पूर्णकालीन कार्यकर्ता खःसा वय्कः थः नं छगू इलय् नेवि संघया कार्यकर्ता जुयाच्वंम्ह खः ।

लिसें आःया सैनिक संरचना दुने वय्कः कटवाल पक्षय् च्वनाच्वंम्ह खः । कटवालं छु धाल वहे याइम्ह धइगु द्वपं लानाच्वंम्ह वय्कः नं सेना समायोजन याये मजिउ धइगु पक्षयाम्ह खः । थज्याःगु पृष्ठभूमि व बिचाः दुम्ह मनू जूगु कारणं वय्कःया नांयात माओवादीं समर्थन मयायेफुगु खँ सूत्रं धाःगु दु ।

एमालेया प्याकेजय् प्रधानसेनापति प्रकरणय् विवादय् लाःम्ह रक्षा मन्त्री रामबहादुर थापा बादलं नं राजीनामा बीगु धइगु प्रस्ताव लानाच्वंगु दु । तर रक्षा मन्त्रीया थ्व राजीनामा स्थितियात नियन्त्रणय् हयेगु लागिं जक जुइफु । रक्षा मन्त्रीं आः राजीनामा बिउसां लिपा हानं वय्कःयात हे नियुक्त याये जिउ ।

सूत्रतय्सं बिउगु जानकारी कथं एमालें तयार याःगु थ्व प्याकेज बारे रक्षा मन्त्री रामबहादुर थापाया निं बिचाः वयेमाःगु जुयाः वय्कःलिसे खँ ल्हायेत एमाले अध्यक्ष झलनाथ खनाल थःहे वंगु दु ।

यदि सरकारं प्रधानसेनापति कटवालयात चीके मफुत धाःसा सरकार त्वःतूसां जिउ धकाः माओवादीया जनमुक्ति सेनापाखें सरकारयात दवाव वयाच्वंगु खँ सीदुगु दु । उकिं नं नेतातय्सं थ्वहे भाय् न्ववायेगु यानाच्वंगु दु ।