नेवाः पुचः व दुतावासं समेत न्यायेकल कोरियाय् न्हूदँ
देसय् दुने सरकारी स्तरं वक्तव्य छगू व मूपाहाँ जुइगु बाहेक मेगु छुं नं मयाःसां राष्ट्रिय संवत् धकाः देसं घोषणा यायेधुंकूगु नेपाःया मौलिक संवत् नेपाल संवतया न्हूदँ देसं पिने दुतावासं धा:सा भव्यरुपं न्यायेकूगु दु ।
नेवाः पुचः, कोरिया व नेपाली राजदुतावास, सउल, कोरियाया मंकाः ग्वसालय् जूगु ज्याझ्वलय् मूपाहाँ महामहिम राजदूत कमलप्रसाद कोइरालाजुं नेपाल संवत् ११३१ न्हूदँया लसताय् सकलसित भिंतुना देछायादिल ।
नेपाःया राष्ट्रिय म्ये 'सयौं फुलका थुङ्गा हामी…।' हाला: शुरु जूगु ज्याझ्वलय् कोरियाय् मदुपिं नेपाःमिया लुमन्तिइ १ मिनेट मौन धारण नं याःगु खः । ज्याझ्वः न्ह्याकादीम्ह माधव प्रसाद श्रेष्ठजुं झायादीपिं सकलें पाहाँपिंत आसन ग्रहण याकादीगु खःसा नेवाः पुचःया न्हापायाम्ह (भूपु) छ्यांजे रमेश प्रजापतिं लसकुस यानादिसें नेपाल संवतयात सरकारं राष्ट्रिय मान्यता ब्यूगु छगू तःधंगु उपलब्धी जूगुलिं आवंलि दुतावासं हे तःधंक ज्याझ्वः यायेमाःगु खँय् बःबियादिल ।
ज्याझ्वलय् एनसीसीया नायः डेविट राई, एनआरएन, कोरियाया नायः विनोद कुँवर, नेपाल कोरिया व्यापार संघया नायः मदन के.सी., आदिवासी जनजाति महासंघया नायः चङ कुमार गुरुङ्ग, गुल्मी सम्पर्क समितिया नायः गान्धिव सुवेदी, बागलुङ्ग सम्पर्क समितिया छ्यांजे याम श्रीस व चित्रकार राजेश मानन्धरजुपिंसं भिंतुना देछानादीगु खः ।
सनमुन युनिभर्सिटीइ पीएचडी यानाच्वनादीम्ह ओम सुवालजुं नेपाल संवतया इतिहास, थ्व गुबले व गुकथं जुल नापं थ्व संवत् नेपाःया जनतां ८०० दँ स्वयां अप्वः छ्यलाबुलाय् हःगु तर चन्द्र शमशेरया पालय् थ्व संवतयात दिका: भारतं वःगु विक्रम संवत् छ्ययेकूगु आदि खँया बारे पावर प्वाईन्टय् प्रोग्राम हे दयेका ध्वाथुइकादीगु खँ नेवाः पुचः, कोरियाया नायः गुरुज्यू नविन वज्राचार्यजुं नेपालमण्डलयात जानकारी बियादिल ।
खुलाया लागिं दक्षिण कोरिया झायादीम्ह चित्रकार राजेश मानन्धरया चित्रकला नं ब्वज्या जूगु ज्याझ्वलय् पाहाँपिंसं नेपाल संवत् धयागु नेवाः तय्गु जक संवत् धकाः भ्रम जुयाच्वंगुलिं थ्व संवत् धयागु सकल नेपाःमिपिनिगु थःगु हे मौलिक संवत् जूगुलिं आवंलिं दूतावासं हे अझ थ्वसिबें बांलाक झःझ धायेक हनेमाःगु बिचाः प्वंकूगु खः ।
स्थानीय दाजुकिजापिंसं म्ये नं हालाः न्ह्याइपुकादीगु खःसा ज्याझ्वःया सभापति नेवाः पुचः, कोरियाया नायः गुरुज्यू नविन वज्राचार्यजुं भिंतुना देछानादिल । पुचःया सक्रिय दुजः मदनलाल श्रेष्ठजुं सकलसितं सुभाय् देछायादीगु खः ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
