तालिम ब्यूगु प्रचार धइगु छुं तुक मदुगु खँ

येँ (झीगु स्वनिगः)

पूर्व परराष्ट्रमन्त्री लिसे मधेशी जनअधिकार फोरमया नायः उपेन्द्र यादवं नेपाली माओवादीं भारतीय माओवादीयात तालिम ब्यूगु प्रचारया छु नं तुक मदुगु धयादिल । म्हिगः साचारकर्मीिपंलिसे खँल्हासें नायः यादवं नेपाली माओवादीं भारतीय माओवादीयात तालिम बिइगु हैसियत हे मतयेगु दावी यानादिल । बरु नेपाःया माओवादी भारतय् वनाः तालिम कायेगु यानाच्वंगु थःम्हं न्यनागु जानकारी ब्यूसें नायः यादवं भारतीय माओवादी नेपाल वःगु प्रचारय् छु नं सत्यता मदुगु धयादिल । वय्कलं सरकारं थ्व प्रचारया छानबिन यानाः स्पष्ट यायेमाःगु धयादिल । नेपाली कांग्रेस व एमाले संबिधान निर्माणया पक्षय् मदुगु द्वपं ब्यूसें नायः यादवं वहे जुया आःया गतिरोध वःगु दावी यानादिल । फुक्क राजनैतिक दल संबिधान निर्माण व शान्ति प्रकृयाप्रति इमान्दार जूसा जक देशय् समस्या समाधान जुइगु वय्कःया धापू खः । इलय् हे बजेट मवयाः देय् आर्थिक संकटय् लायेत्यंगु धासें नायः यादवं उकिया जिम्मेवारी सत्ताय् दुगु कांग्रेस व एमालें कायेमाःगु धयादिल ।