इण्डोनेसियाया एकता विश्वया नितिं प्रेरणा
जाकर्ता (एएफपी)
अमेरिकी राष्ट्रपति बाराक ओबामा थःगु औपचारिक भ्रमणया भुवलय् म्हीग भारतया न्हू दिल्लीपाखें म्हिगः इण्डोनेसियाय् थ्यंक झाःगु दुसा अनं प्रजातन्त्र दिवस हनेत ब्वति कयादीगु दु । इण्डोनेसियां तानाशाही लौह शासनपाखें मुक्ति कयाः प्रजातान्त्रिकरण जूगु दिवसयात लुमंकादिसें म्हिगः प्रजातन्त्र दिवस हनादीगु दु । राष्ट्रपति ओबामां थःगु किशोरावस्थाया आपालं दँ इण्डोनेसियाय् हनागु न्ह्यःथनादिसें मुसलमानी लिसे पश्चिमी संस्कारया मिश्रित इण्डोनेसियाली समाजया प्रशंसा यासें थ्वहे भूमिपाखें उत्प्रेरणा कयाः च्वय् दनाः थः अमेरिकी राष्ट्रपति जुइत ताःलाःगु न्ह्यथनादिसें । थःम्हं इण्डोनेसिया त्वःताःगु पीदँ दयेधुंकाः नं थ्व देय् न्ह्याबलें थःगु अभिन्न अङ्ग थें हे जुइगु धयादिसें थनया धार्मिक सहनशिलतां विश्वयात छगू आदर्शमय नमुना न्ह्यब्वयागु नापं धयादिल ।
मचाबलय् थः तःधिकः जूगु पितृभूमि लुमंकादिसें उगु इलय्या शान्त जाकर्ताय् भुतुमालि ब्वयेकाःगु वा पिनातःगु बुँइ ब्वाँय् जुयागु बुँइ कीचा ज्वनागु आदि खँ न्ह्यथनाः मचाबलय्या ईया बर्णन यानादिल । बहुसङ्ख्यक मुसलमान दुगु राष्ट्र जूसां नं पश्चिमी मोडेलया प्रजातन्त्रयात आत्मसात यानाः राष्ट्रिय एकता न्ह्याबलें प्रर्दशन याइगु इण्डोनेसिया विश्वयात न्ह्याबलें प्रेरणादायी जुयाः च्वनेफयेमाः धकाः मनंतुना दिल । करिब ६ हजार स्वयाः अप्वः इण्डोनेसियालीं खचाखच जायाच्वंगु राष्ट्रिय विश्व विद्यालयया अडिटोरियम हलय् राष्ट्रपति ओबामां न्वंवानादीबलय् ब्वति दुपिं फुक्कं मुग्ध जूगु खः ।
More Stories Like this
दक्षिणी अफगानिस्तानय् नीम्ह तालिवानपाखें आत्मसमर्पण भारतया उडिसाय् चलखं झिंखुम्ह सित अमेरिका व बेलायतया गुप्तचर एजेन्सीया गद्दाफीलिसे साँठगाँठ रुसं सिरीयाया चिकं मन्यायेगु विषययात कयाः कुंखिन जापानय् न्ह्यगू दशमलव छगू रेक्टरया भुखाय्
