नियम अःखः भर्ना काःगु धासें तालाबन्दी
ख्वप (झीगु स्वनिगः)
नेपाल विद्यार्थी सङ्घ सिटिइभिटी शाखां चक्रवर्ती हवी नर्सिङ कलेज थिमिइ म्हिगःनिसें अनिश्चितकालीन तालाबन्दी याःगु दु । प्राविधिक शिक्षा लिसे व्यावसायिक तालिम परिषद् सिटिइभिटीया नियम अःखः स्वदँया नर्सिङ विषयलय् भर्ना काःगु धासें सङ्घं तालाबन्दी याःगु विद्यार्थी नेता विकास थापां जानकारी ब्यूगु दु ।
नर्सिङ विषयलय् खाली जूगु थासय् थप भर्नाया नितिं सिटिइभिटीया स्वीकृत बिना हे सूचं जारी यानाः थःमंदुथें थः मनूतय्त भर्ना याःगु धासें तालाबन्दी याःगु सङ्घं जानकारी ब्यूगु दु । कलेज प्रशासनं धाःसा कटअफ लिस्टय् नां पिहाँवःपिं विद्यार्थीयात नियम कथं हे भर्ना याःगु धाःगु दु ।
अथेहे सिटिइभिटीं धाःसा विद्यार्थी भर्नाया विषयलय् छानबिन न्ह्याकूगु व याकनं हे उकिया प्रतिवेदन पितबिइगु जानकारी ब्यूगु दु ।
