प्र.म. चुनावय् बिचाः यायेत सर्वोच्चया उजं
येँ (झीगु स्वनिगः)
सर्बोच्च अदालतं व्यवस्थापिका संसद नियमावलीइ न्ह्यःथनातःगु प्रधानमन्त्री निर्बाचन सम्बन्धी व्यवस्थाय् हाकनं बिचाः यायेत सभामुख सुवास नेम्वाङयात उजं ब्यूगु दु । न्यायाधीशिपं कल्याण श्रेष्ठ व गिरिशचन्द्र लालया मंकाः इजलासं झिंखुक्वःगु खुसिया निर्बाचनपाखें नं प्रधानमन्त्री ल्ययेमफयाः देय् गम्भीर संकटय् थ्यंगु लिच्वः पिकासें नियमावलीया व्यवस्थाय् हाकनं बिचाः यायेत उजं ब्यूगु खः ।
थुगु उजंपाखें निर्वाचन प्रक्रिया दुहाँवनेधुंकाः उकियात त्वःते मज्यूगु नियमावलीया व्यवस्थायात परिमार्जन यायेगु लँपु चाःगु दु ।
उजंलय् माग याः कथंया पौडेलयात प्रधानमन्त्री घोषणा यायेगु परमादेश धाःसा पिथनेम्वाःगु न्ह्यःथनातःगु दु । रीट लच्छि न्ह्यः अधिवक्ता प्रभुकृष्ण कोइरालां दायर यानादीगु खः ।
