माओवादी प्रस्ताव अस्वीकार यायेत काङ्ग्रेया इनाप
येँ (झीगु स्वनिगः)
एकीकृत नेकपा माओवादीं प्रस्ताव याःगु अध्यक्षात्मक प्रणाली अस्वीकार यायेत नेपाली काङ्ग्रेसं एमालेयात इनाप याःगु दु । एमालेया बरिष्ठ नेता नापं जुयाच्वंम्ह प्रधानमन्त्री माधबकुमार नेपालयात काङ्ग्रेस नेतातय्सं म्हिगः सुथय् बालुवाटारय् नापलानाः माओवादी प्रस्ताव अस्वीकार यायेत इनाप याःगु खः । मुख्य स्वंगू दलया शीर्ष नेतापिनिगु ब्वति दुगु अध्यक्ष मण्डल दयेकाः पालंपा सरकारया नेतृत्व यायेत माओवादीं प्रस्ताव याःगु खः । काङ्ग्रेस नेता गोपालमान श्रेष्ठं बैठकय् ब्वति दुम्ह एमाले नेता केपी ओलीं अध्यक्षात्मक प्रणालीपाखें जूसां नं गतिरोध अन्त्य यायेमाःगु पार्टी नायः झलनाथ खनालया अभिव्यक्ति व्यक्तिगत जूगु धकाः जानकारी बियादिल ।
स्वंगू दलया बैठकय् साझा धारणा दयेकेत सहलह जूगु वय्कलं पत्रकारतय्त जानकारी बियादिल । मुख्य स्वंगू दलया बैठक च्वनेन्ह्यः प्रधानमन्त्री नेपालयात नापलायेत काङ्ग्रेस नेतात रामचन्द्र पौडेल गोपालमान श्रेष्ठ विमलेन्द्र निधि डा. रामशरण महत व कृष्णप्रसाद सिटौला सुथय् न्हय्ताः इलय् बालुवाटार थ्यंगु खः ।
