माधवया निर्देशनय् जंगी अड्डाया ग्राईण्ड डिजाईन

येँ (झीगु स्वनिगः)

एकीकृत नेकपा माओवादी सैन्य प्रमुख वर्षमान पुन अनन्तं कामचलाउ सरकारया प्रधानमन्त्री माधवकुमार नेपालया निर्देशनय् नेपाली सेनाया पूर्वी पृतनापाखें भारतीय माओवादीयात नेपाःया क्यान्टोनमेन्टय् तालिम ब्यूगु धकाः योजनाबद्ध कथं प्रतिवेदन तयार याकेबिया दिल्ली छ्वःगु दावी यानादीगु दु । बुधवाः येँय् जूगु साक्षात्कार ज्याझ्वलय् सैन्य प्रमुख अनन्तं भारत सरकारं संस्थागत कथं माओवादीयात शान्ति प्रकि्रया व संविधान दयेकेगु प्रकि्रयां पिनेतय्गु माओवादीयात प्यख्यरं घेराबन्दीइ लाकेगु व नेपालय् सैन्य हस्तक्षेप यायेगु आधार तयार यायेगु कथं योजनाबद्ध षडयन्त्र जुयाच्वंगु धयादिल ।

एमाले नेतृत्वया सरकारया निर्देशनय् अज्याःगु फुक्कं षडयन्त्र जूगु खः - धयादिसॆ वय्कलं खुला न्ह्यः हे नेपाली सेनाया जंगी अड्डां पूर्वी पृतनायात थुज्वःगु रिपोर्ट तयार यायेत धकाः निर्देशन ब्यूगु नापं उगु हे कथंया रिपोर्ट दयेकाः छ्वःगु सूचं थःत वःगु दाबीयासें उगु रिपोर्ट भारतीय राजदूतया स्वार्थय् जूगु नं धयादिल ।
लिपांगु इलय् भारत-नेपालया शान्ति प्रकि्रया व संविधान च्वज्या निश्कर्षय् मथ्यनेमाः धैगु आशय् दुगु पुष्टी जूगु आशंकायात बहः ब्यूगु अनन्तं दावी यानादिल । भारतं उकियात कयाः थःपिनिगु आधिकारीक पितबिइमाः धासें वय्कलं भारतया दावी पुष्टि जूसा थः व थःगु पार्टीं न्ह्यात्थेंज्याःगु सजाँय फयेत तकं तयार दुगु धयादिल । वय्कलं नेपाल सरकारं नं थुज्वःगु गम्भिर विषयसं तत्काल छानविन यानाः थःगु पोजिसन स्पष्ट यायेमाः धयादिल ।

संविधानसभाया म्याद थप याकेमबीगु योजनाकथं उज्वःगु षडयन्त्र याःगु जूसां लिपा जक हल धकाः दावी यानादिसें वय्कलं प्रधानमन्त्रीं लिपांगु इलय् राष्ट्रपतियात सकि्रय यायेगु धकाः ब्यूगु धापू नाप नं थ्व खँया स्वापू दु धकाः दावी यानादिसें वय्कलं भारतीय राजदूत राकेश सुदया विशेष कुतलय् थुगु खँ न्ह्यःने हःगु खः धकाः नं धयादिल ।