ल्हुतिइ नं न्हूदँया लसताय् भिंतुना र्याली व मोटरसाइकल र्याली
नेपाल संवत् ११३१ न्हूदँया लसताय् येँया ल्हुतिइ नं भिंतुना र्याली व मोटरसाइकल र्याली यासें तःजिक न्हूदँ हंगु दु । तिमिला खलः ल्हुतिया ग्वसालय् जूगु भिंतुना र् याली मूपाहाँ राजभाइ जकःमिजुं ल्हुतिइ च्वंगु गणेद्यः पुजा यासें रिबन चाना उलेज्या यानादीगु खः । र्याली गणेद्यःया थासं शुरु जुयाः चौकी, आदर्श नगर, बिनायक वस्ती, बालाजु चोक, चौकी, बाईपास, तरुण मार्ग, बाहिनी मार्ग, बाईपास, लखपातः (गुहेश्वरी देगः, मोटरसाइकलं र्याली वंपिं जक) लखपातः पुलां बजाः, शेषमती तां, नेपालटार जुयाः फुसिंख्यलय् थ्यंकाः क्वचायेकूगु खः ।
भिंतुना र् यालीइ थीथी खलः, पुचः व बाजं खलकं ब्वति काःगु खःसा आपालं ल्याय्म्ह ल्यासेपिं प्याखँ हुलाः चाःह्यूगु खः । र्याली धुंकाः जूगु सभाय् ग्वहालि यानाः दीपिं थीथी खलः, पुचः व बाजं खलःयात मूपाहाँपाखें हनादीगु खः । र्यालीइ ब्वति कयादीपिं थीथी बाजं खलःपिं दथुइ दँय्दसं थें बाजं संरक्षण व विकासया लागिं धकाः गोला तया न्हाप व ल्यू लाःगु बाजं खलः छसिकथं धिमे खलः, फुसिंख्यः व सितला माई धिमे खलः, ल्हुतियात मू पाहाँ राजभाइ जकःमिजुं दां सिरपा नं देछानादिल ।
इन्द्रायणी युवा क्लवया ग्वसालय् जूगु थुगु सभाय् सकुन्दा खलःया नायः गणेशमान महर्जनं लसकुस यानादीगु खःसा तिमिला खलःया नायः महेश्वर मानन्धरजुं नेवाः भाय् व नेवाः समाजया अस्तित्वया निंतिं नेवाः राज्य व नेवाः सत्ताया विकल्प मदुगु खँ धयादिल । बाइसधारा युवा क्लवया नायः विक्रम मानन्धरजुं नं भिंतुना न्वचु बियादीगु ज्याझ्वलय् मूपाहाँ राजभाइ जकःमिजुं थःगु चिनाखँ न्यंकादीगु खः ।
थुगुसीया भिंतुना र्याली लिसें जूगु मोटरसाइकल र्याली उत्साहजनक जूसांतबि थ्व ल्याः न्हापास्वयाः म्हो जूगु अनुमान याःगु दु । नेवाः बस्तीइ गैर नेवाःत च्वंवःगुया प्रभाव नापं स्वन्ति नखः स्यंकाः नेवाःतयत थवं थवय् ल्वाकेगु सरकारी कुनियतया हुनिं जूगु तिथि गडबडं याना थथे जूवंगु तिमिला खलःया नायः महेश्वर मानन्धरं नेपालमण्डलयात जानकारी बियादिल ।
किपा : तिमिला खल:, ल्हुति, यें ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
