गतिरोधय् बुद्धिजीवीपिनिगु च्यूताः

येँ (झीगु स्वनिगः)

वर्तमान राजनीतिक गतिरोध अन्त्यया विषयलय् वुद्धिजीवीपिनिगु बिचाःत ल्वाःगु दु । म्हिगः येँया जनसाचार अभियानय् ग्वसाः ग्वःगु छगू साक्षात्कार ज्याभुवलय् वर्तमान राजनीति व थुकिया निकासया विषयलय् उमिगु बिचाः ल्वाःगु खः ।
ज्याभुवलय् प्राध्यापक डा. गोपाल शिवाकोटी चिन्तनं शासितपिनिगु ल्हातय् शक्ति लःमल्हाःतले समस्याया समाधान मजुइगु बिचाः प्वंकादीगु खः । वय्कलं छु नं कम्युनिष्टं संविधानसभापाखें संविधान निर्माण याःगु इतिहास आःतक्क गनं मदुगुिलं माओवादीं जनवादी संविधान च्वइ धकाः हथाय् चायेगु औचित्यहीन तर्क जूगु बिचाः तयादिल ।

चिन्तनं राष्ट्रपति शासन रामचन्द्र पौडेलयात सर्वोच्चं प्रधानमन्त्री दयेकेगु थेंज्याःगु हावादारी खँ मल्हायेत राजनीतिक पार्टी व गुलिखय् वुद्धिजीवीयात सुझाव नापं बियादीगु खः ।
ज्याभुवलय् बुद्धिजीवी शेरबहादुर के. सीं. राष्ट्रपतियात सत्ता लःल्हाये धायेगु प्रधानमन्त्रीया धापू संविधान सम्मत जूगु तर्क यानादिसें रामचन्द्र पौडेलया पक्षय् अदालतं फैसला याःसा वय्कः प्रधानमन्त्री जुइमफइगु दाबी यानादिल ।
मेम्ह बुद्धिजीवी डा. सुरेन्द्र के.सीं. देशय् संकटकाल तःसा थ्वथें दुर्भाग्य मेगु छु नं मजुइगु बिचाः नापं प्वंकादिल ।