अमेरिकाय् म्हपुजा व न्हूदँ ज्याझ्वः

सं.रा. अमेरिकाया थीथी थासय् नेवाःतय्सं सामुहिक म्हपुजा याःगु दु । म्हपुजा लिसें अमेरिका न्यंक थीथी थासय् नेपाल संवत् ११३१ न्हूदँया ज्याझ्वःया समाचार प्राप्त जूगु दु ।

सं.रा. अमेरिकाया ओरेगन स्टेनया पोर्टल्याण्डय् नृत्यमण्डल महाविहारय् शनिवाः पुचः म्हपुजा जूगु दु । उकिइ नेवाः व गैर नेवाःतय्गु उत्साहजनक सहभागीता जूगु खः । ज्याझ्वलय् पुजा पाठ प्रज्वल वज्राचार्यं याना बिज्याःगु खः ।

अथे हे शनिवाः हे सिकागो नेवाः गुथिं सिकागोय् नं पुचः म्हपुजा याःगु दु । उगु ज्याझ्वलय् म्हपुजा लिसें सांस्कृतिक ब्वज्या नं जूगु खः ।

न्हूदँया लसताय् नेवाः कल्चरल एसोसिएसन अफ टेक्सस व झीगु सः रेडियोया ग्वसालय् वंगु वालय् टेक्सस् स्टेटय् नेवाः भ्वय् आयोजना याःगु खःसा थ्वहे वइगु नोभेम्वर १३ तारिख खुन्हु नेवाः अर्गनाइजेशन अफ अमेरिकां मेरिल्याण्डय् न्हूदँ ज्याझ्वः यायेत्यंगु दु, गुकिइ गायक संजीप प्रधानया न्हूगु नेपालभाषा म्येचाः "छगू देय्या लाय्कू" विमोचन जुइ । अथे हे नोभेम्वर २७ तारिख खुन्हु नेपाः पासा पुचः अमेरिकाय् पाखें न्हूदँया मेगु ज्याझ्वः यायेत्यंगु दु ।

(किपा - पोर्टल्याण्डया म्हपुजा, प्रज्वल वज्राचार्यपाखें)

More Stories Like this