यूकेय् हन तःजिक न्हूदँ

वंगु शनिवाः पासा पुचः गुथि यूकेया ग्वसालय् विम्ली धैगु थासय् तःजिक म्हपुजा व न्हूदँ हना ज्याझ्वः क्वचाल । थुगु मुज्यां नेवाः समुदायया मुनाया झिदँ क्यंगु खः ।

ज्याझ्वःया उलेज्या यानादिसें मूपाहां पद्मरत्न तुलाधरं नेवाः संस्कृतिया महत्व व सम्पन्नता न्ह्यथनादिसें विदेशी भूमिंनिसें थुकियात छ्यलाः संरक्षण यायेमाःगुलिइ बः बियादिल । अथे हे गुथिया नायः सचेतन तुलाधरं नेवाः एकताया बारे न्ववाना दिल । ज्याझ्वलय् बेलायतया लागि नेपाःया राजदूत डा. सुरेशचन्द्र चालिसे, नेपाली कांग्रेसया महासचिव प्रकाशमान सिंह, गुथिया सल्लाहकार प्रोफेसर डेभिड गेल्नर, गुथिया मेपिं संस्थापक सदस्यपिं व कचा गुथिया नायःपिनिगु नं उपस्थिति दुगु खः ।

इंग्ल्याण्ड न्यंकया प्यसः मल्याक पाहांपिन्सं ब्वति काःगु ज्याझ्वलय् नेवाः संस्कृति न्ह्यब्वइगु थीथी प्याखं नं न्ह्यब्वःगु खःसा नेवाः पहःया लप्ते भ्वय् नं जूगु खः । ज्याझ्वःया अन्तय् पाहांपिन्त मसला प्वः व गुथि पत्रिका नं लःल्हानागु जानकारी गुथिया ल्यू छ्याञ्जे संयुक्त श्रेष्ठजुं नेपालमण्डलयात बियादिल ।

ज्याझ्वःया थप किपा






(किपा - केशव महर्जन/संयुक्त श्रेष्ठ, लण्डन)

More Stories Like this