प्रम नेपालं हानं आयोग गठन यायेगु आश्वासन
प्रधानमन्त्री माधवकुमार नेपालं नेपाल संवतया बारे विस्तृत अध्ययन यायेत आयोग गठन यायेगु आश्वासन हानं छक्वः बियादीगु दु । थ्वस्वयां न्ह्यः ने. सं. ११३०या लसताय् नं वय्कलं थंज्याःगु हे आश्वासन बियादीगु खः ।
नेपालभाषा मंकाः खलः न्हूदँ समारोह समिति ११३१या ग्वसालय् थौं येँया बसन्तुली जूगु सभाय् प्रधानमन्त्री नेपालं न्हापा थःम्ह हे यानागु बचं पूमवंगु धयादिसें थीथी ख्यःया विज्ञत दुथ्याकाः आः आयोग गठन यायेमाःगु धयादिल ।
वय्कलं थौं सुथय् थिमि जूगु ज्याझ्वःया दथुइ हे थःम्हं मुख्य सचिव व संस्कृति मन्त्रालयलय् फोन यानाः मेगू मन्त्रीपरिषदया मुँज्याय् पेश जुइगु कथं प्रतिवेदन लःल्हायेत निर्देशन बियागु कनादिल । वय्कलं थिमिं हे फोन यानाः निर्देशन ब्यूगु खःसां आयोग गठन यायेगु धकाः बसन्तपुली वयाः जक घोषणा यानादीगु खः ।
ज्याझ्वलय् पुलांम्ह प्रधानमन्त्री कृष्णप्रसाद भट्टराईयात शंखधर इमेज सिरपा लःल्हाःगु खः । सिरपा लःल्हानाकायेधुंकाः भट्टराईं सिरपा चयन समितियात सुभाय् बियादिसें थः १००दँ तक म्वाःसा बसन्तपुली दबुली हे वयाः हानं छक्वः सुभाय् देछायेगु धयादिल ।
सभा स्वयाः न्ह्यः न्हूदँयात लसकुस यासें तःजिगु र्याली कुमारीया खः सालेगु लँ (क्व:ने व थःने) चाहिउगु खः ।
