थिमिइ शंखधरया झ्वताय् स्वांमाः क्वखाकल
नेपाल सवंत् ११३१ न्हूदँ क्यंगु लसताय् थौं नेपाल संवतया प्रवर्तक शंखधर साख्वःया थिमिइ च्वंगु झ्वताय् थीथी व्यक्तित्वतय्सं स्वांमाः क्वखाकूगु दु । शंखधर साख्वाः प्रतिष्ठानया ग्वसालय् जूगु ज्याझ्वलय् प्रधानमन्त्री माधवकुमार नेपाल लगायत थीथी दलया नेतात नापं भाषिक न्ह्यलुवातय्सं झ्वताय् स्वांमाः क्वखाकूगु खः ।
प्रतिष्ठानया नायः श्यामकृष्ण मानन्धरया सभापतित्वय् जूगु ज्याझ्वलय् प्रधानमन्त्री माधवकुमार नेपालं राष्ट्रिय विभूति शंखधरं समाजय् यानादीगु योगदानया बारे चर्चा यानादिसें वय्कया बारे पाठ्यक्रमय् दुथ्याकेत पहल यायेगु धयादिल ।
ज्याझ्वलय् समान्य प्रशासन मन्त्री रविन्द्र श्रेष्ठ, कांग्रेस संसदीय दलया नेता रामचन्द्र पौडेल, राप्रपाया नायः पशुपति शम्सेर जबरा, राप्रपा नेपालया नायः कमल थापा, नेवाः राष्ट्रिय पार्टीया नायः डा. केशवमान शाक्य, नेवाः देय् दबूया संरक्षक मल्ल के. सुन्दर लगायतं थःथःगु नुगः खँ प्वंकादीगु खः ।
