किपुलिइ नं भिंतुना र्याली, म्हछम्हंया शंखधर साख्वाःया झ्वाता उलेज्या
नेपाल संवत् ११३१ न्हूदँया लसताय् किपुलिइ नं भिंतुना र्याली पिदंगु दु । थीथी खलः,पुचः, बाजं खलः दुथ्याःगु थुगु रयाली म्वानत्वालं शुरु जूया देय् चाःहिउगु खः । नेपाल संवतया प्रणेता शंखधर साख्वाःया मूर्तियात प्यम्हमय्जुपिंसं कुबिया थुगु रयाली चाःहिउगु खः ।
१७ फुटम्ह शंखधर साख्वाःया झ्वाता
नेपाल संवत् ११३१ न्हूदँया लसताय् किपूया बाघभैरवया प्रजा दबुलिइ नेपाल संवतया प्रणेता व राष्ट्रिय विभूति शंखधर साख्वाःया झ्वाताया उलेज्या जूगु दु । स्थानिय कीर्तिपुर युनाइटेड क्लवया नीन्यादँ बुन्हिया लसताय् क्लवया नायः बुद्धरत्न महर्जन, बाघभैरव भजन खलःया नायः राम बहादुर महर्जन, इताछें दापा खलःया गुरु कुल बहादुर महर्जन व झ्वाता पलिस्था पुचःया कजि बुद्धरत्न महर्जनजुपिंसं मंकाःकथं थुगु झ्वाताया उलेज्या यानादीगु खः ।
५ फुट दुम्ह म्हछम्हंया झ्वाताया स्केचयानादीम्ह चन्द्र महर्जन खःसा मूर्तिकार रामकृष्ण भण्डारीं झ्वाता कियादीगु खः । झ्वाताया जाः थां व दबूसहित १७ फीत तःजाः ।
निदँ न्ह्यः क्लवया साधारण सभां क्वःछयूकथं करीव ४ लाख २० हजारया अनुमानित बजेटं थुगु झ्वाताया पलिस्था जूगु खः ।
कुल बहादुर महर्जनया सभापतित्वय् जूगु थुगु ज्याझ्वःलय् समाजसेवी हरिशरण महर्जन, किपू नगरपालिकाया प्रतिनिधि सानुबाबु परियार, सभासद् दिलिप महर्जन व मू पाहाँ इतिहासविद् काशिनाथ तमोटं नुगः खँ कनादीगु खः ।
