देशया अन्यौल परिस्थिति मदयेकेगु लागि जनताया दबाव आवश्यक : सभामुख नेम्वाङ
संविधान सभाया सभामुख सुवास चन्द्र नेम्वाङं नेपाःया मू मू दलत छप्पँ जुइ मफूगुलिं देशय् ब्वलनाच्वंगु अन्यौल परिस्थितियात मदयेका छ्वयेगु लागि जनतां दवाव बीमाःगु खँ धयादिल ।
थौं नेपाल सम्वत ११३१ या लसताय् न्हूदँ हनेगु झ्वलय् यलया मंगलय् न्हूदँ हना ग्वसालय् जूगु भिंन्तुना ज्याझ्वलय् न्ववानादिसें मूपाहां सभामुख नेम्वाङं नेपाल सम्वतयात राष्ट्रिय सम्वतया मान्यता बी धुंकूगु व थुकियात राष्ट्रिय कथं छ्यलाबुला हयेगु लागि ग्वाहालि यायेत न्ह्याबलें तयार जूगु खँ धयादिल ।
न्हूदँ हना ग्वसाः खलःया कजि नापं ज्याझ्व:या सभाध्यक्ष सुरेश प्रधानं आः वइगु संविधानय् 'नेपालको संविधान नेपाल सम्वत ११३१' उल्लेख जुइमाःगु माग यानादीगु दु । नापं वयकलं नेपाल सम्वतयात नेपाल सम्वत राष्ट्रिय सम्वत जुइधुंकूगुलिं थुकिया प्रचार प्रसार राष्ट्रिय स्तरं यायेमाःगु व थुकिया दायित्व सरकारयागु खः धयादिल ।
ज्याझ्वलय् ज्यापु समाजया नायः रामकाजी अवाले, समाजसेवी मोतिलाल सिल्पकार, संस्कृतविद् सत्यमोहन जोशी, सिद्धिलाल सिंह, कृष्णलाल महर्जन, डा. पुष्पराज राजकर्णिकार, एकिकृत नेकपा माओवादीया हरि दाहाल, नेपाली कंग्रेसया मदन अमात्यया उपस्थिति दुगु खः । उगु ज्याझ्वलय् भिन्तुना र्याली ब्वति काःगु ब्यानर व बाजं खलःयात गोला प्रथापाखें सिरपाः नं लःल्हाःगु खः ।
ब्यानरय् कुतिसौगः मां पुचः न्हाप, तलाछेँ मां पुचः लिउ व धपगाः मां पुचः लियांलिउ लाःगु खःसा बाजं खलकय् ल्वहंल धिमे बाजं न्हाप, त्यागः बाजं खलः लिउ व च्यासः बाजं खलः लियांलिउ लाःगु खः । ब्यानर व बाजं खलःयात बीगु सिरपाः छसिकथं समाजसेवी मोतिलाल सिल्पकार व यल उप-महानगरपालिकां प्रायोजित याःगु खः ।
भिन्तुना ज्याझ्वः न्ह्यः लुँखुसिं नेपाल सम्वतया प्रवर्तक शंखधर साख्वाः झ्वाता मंगलबजारय् हःगु खःसा नेपालभाषा एकेदमिया चान्सलर नापं संस्कृतविद् सत्यमोहन जोशीं यल प्रकाशनया वाःपौ 'नेवाः पौ' न्हापांगु ल्याःया उलेज्या यानादिसें भिन्तुना राय्लि न्ह्याःगु खः । उगु भिन्तुना राय्लि मंगलबजारं न्ह्यानाः सौगः, नुगः, ओकुबहाः, इति, पूर्णचण्डि जुयाः पूच्वःय् थ्यंकाः शंखधर साख्वाया झ्वाताय् स्वांमा क्वखायेकेगु ज्या जूगु खः । अनं छाःबहाः, पिम्वहाः, बालिफः, क्वालखु, क्वन्ति, स्वथः जुयाः मंगलय् क्वचाःगु खःसा उगु भिन्तुनार् याली यलबासीतय्गु उत्साहजनक ब्वति दुगु खः ।
